Besnik Cani nuk është një emër i panjohur në drejtësi. Në vitin 2015 Cani largohet nga posti i drejtuesit në Prokurorinë e Shkodrës duke u transferuar në atë të Elbasanit.
Besnik Cani zëvendësohet pas një periudhe prej afro 2 vjetësh e 3 muaj që shërbeu në Shkodër. Prokurori Cani gjatë dy viteve të punës së tij në Shkodër la jo pak shenjë me disa çështje të cilat i mori përsipër.
Do të mbahet mend për evidentimin e një pjesë të familjeve që ndodhen në gjakmarrje dhe luftën ndaj këtij fenomeni nga ana e prokurorisë së Shkodrës, ku Cani mori në shqyrtim dosjet të cilat nuk hapeshin prej kohësh.
Besnik Cani do të vinte në Shkodër në prillin e 2013-ës pasi deri në atë kohë drejtonte prokurorinë e rrethit të Fierit. Pas Shkodrës ai drejtoi Prokurorinë e Elbasanit. Në krye të prokurorisë së Elbasanit ish kryeprokurori Adriatik Llalla emëroi prokurorin Dritan Ginën, bashkëshortin e bashkëpunëtores së tij më të afërt, Rovena Gashit.
Forcimi i klanit të dyshes Llalla- Gashi çoi në largimin e Canit që me sa duket nuk ishte pjesë e tij, e riktheu Canin në Prokurorinë e Tiranës, si prokuror nga ku e ka nisur karrierën rreth dy dekada më parë.
Me lëvizjen më të fundit të Arta Markut, kryeprokurorja e Përgjithshme e përkohshme po tregon se po promovon ata që u goditën në karrierë nga paraardhësi i saj në detyrë. Lëvizje këto që çojnë drejt dobësimit të grupit të promovuar nga Llalla.
Përgatiti:AlpeNews.al
