Kur nuk na ndan shumë nga publikimi i emrit të kandidatit për president që do të dalë nga PS-ja, ditën e nesërme pritet që të mbahen një sërë procedurash, deri te votimi i tij në Presidencë.
Gazetari Ergys Gjençaj në një raportim live për News24 nga jashtë selisë rozë, ku po mbahet mbledhja e Kryesisë, sqaroi procedurën që vjen pas kësaj faze të parë.
“Pasi të publikohet emri sot nga kryeministri Rama, ai do ta dërgojë në grupin e saj parlamentar, i cili do të mblidhet paraditen e nesërme rreth orës 10:00 nga ku do të mblidhen dhe firmat e nevojshme. Kushtetuta përcakton se duhen të paktën firmat e 20 deputetëve për mbështetjen e një kandidati për President të Republikës. Më pas firmat do depozitohen zyrtarisht në Kuvendin e Shqipërisë. Afati maksimal i cili është përcaktuar në konferencën e fundit të kryetarëve është vendosur ora 12:00 e ditës së nesërme e më pas, në orën 16:00 do të mblidhet komisioni i ligjeve, i cili do të shqyrtojë kushtetueshmërinë, kriteret ligjore kushtetuese të kandidatit të propozuar nga PS, për t’iu drejtuar në orën 18:00 seancës së posaçme parlamentare për raundin e katërt për zgjedhjen e Presidentit. Kushtetuta përcakton që në këtë raund, Presidenti zgjidhet me minimumi 71 vota”, tha Gjençaj.
