Bota nuk është vetëm Samsung dhe Apple. Të premten Sony ka prezantuar familjen e re të telefonëve inteligjentë, Xperia R.
Kjo linjë është e përqendruar në prodhimin e telefonëve buxhetorë për tregjet në zhvillim, transmeton “PC World”. Xperia R1 dhe Xperia R1 Plus do të fillojnë të shiten në Indi dhe do të ofrojnë harduer të rangut të mesëm.
Xperia R1, që kushton më pak nga të gjithë, ka ekran 5.2 inç 720p, procesor Snapdragon 430, 2GB RAM dhe 16GB memorie të brendshme e cila mund të zgjerohet falë kartave SD. Bateria ka një kapacitet prej 2,620 mAh. Telefoni përmban një portë USB-C dhe mbështetje për dy karta.
Xperia R1 Plus, ndërkohë, është shumë i ngjashëm me modelin Xperia R1. Ndryshimi, po të shihet me kujdes, është në brendësi falë 3GB RAM dhe 32GB memorie të brendshme. Sa do të kushtojnë? Jo shumë: 215 dhe 245 dollarë.
