Jo vetëm shqiptarët por e mbarë bota demokratike ka qëndruar një natë pa gjumë, nga shqetësimi se mos Ilir Meta na bën proçkën e zezë dhe vret veten vërtetë. Sepse ai është i njohur tashmë për cilësinë e tij të rrallë, që kur e jep fjalën, ska burrë nëne që e ndalon të kthehet mbrapsht.
Deklarata e Ilir Metës se “jam i gatshëm për të dyja ekstremet. Që nga dorëzimi i mandatit tim si President pasi të sigurohem që vendi ka një zgjidhje politike parimore, kushtetuese, solide që e çon përpara, e deri tek sakrifikimi i jetës sime si Salvador Allende për të ndaluar instalimin e një junte që mund ta kthente Shqipërinë 30 vite pas”, u transmetua në të gjitha mediat e botës.
Frika bëhet edhe më e madhe sepse ngjashmëria mes Allendes dhe Ilir Metës është si mes dy pikave uji nga burimet e Bogovës. Le të rendimisim disa prej tyre:
- Salvador Allende ishte fizikan përpara se të merej me politikë, ndërsa Ilir Meta peshëngritës, komentator futbolli dhe studioi për ekonomi politike.
- Kur u bë Allende President i Kilit në vitin 1970, Ilir Meta sapo kishte lindur.
- Allende ishte me origjinë nga një familje borgjeze dhe u bë marksist. Ilir Meta hyri në politikë nga një parti marksiste dhe tani ia ka dalë që të ketë një familje borgjeze.
- Ish Presidenti i Kilit u akuzua për filo sovjetik, ndërsa Ilir Meta sapo është betuar se amerikanët e kanë shumë gabim kur thonë se në zhvillimet e Shqipërisë ka ndikim rus.
- Salvador Allende kishte mustaqe. Ilir Meta rruhet taze. Zyra e tij nuk e pranon këtë shenjë neotomane. Edhe Bujar Nishani, hyri me mustaqe dhe doli i rruar taze.
- Presidenti i Kilit vrau veten me një automatik Kallashnikov, në Shqipëri këto armë, pas hapjes se depoteve ushtarake ne 1997, janë shitur për luftra në vende me trazira ku vrasin njëri tjetrin.
- Kili nuk ka patur tradita me vetvrasjet e udhëheqësve. Ndërsa Ilir Meta ecën në traditën e pasur të paraardhësve të tij. Ish Kryeministri për 31 vjet i Shqipërisë, Mehmet Shehu vrau veten në 17 dhjetorin e 1981, ndërsa Alfred Moisiu ka deklaruar tek emisioni i Fevziut se edhe ai ka dashur ta vrasi një a dy herë veten, por kur nuk ishte President.
- Salvador Allende u rrëzua nga komandanti i ushtrisë së Kilit, gjenerali Augusto Pinoçet, ndërsa në Shqipëri Ilir Meta është vetë Komandati i Përgjithshëm i Forcave të Armatosura të Republikës së Shqipërisë.
- Salvador Allende u zgjodh Presidenti i Kilit pas 20 vitesh të mbushura me beteja politike opozitare dhe garoi 4 herë rresht për këtë post, ndësa Ilir Metës i ka ecur jeta fjollë duke i ngjitur të gjitha shkallët që nga ministër, zv. Kryeministër, Kryeministër dhe Kryetar i Parlamentit të Shqipërisë, duke qenë pothuajse gjithmonë në pushtet për afër 20 vjet.
- Salvador Allende njihej si mik i Fidel Kastros i cili i kishte falur edhe helmetën që mbante në kokë në momentin e vetvrasjes, ndërsa Ilir Meta si mik i Gjukanoviçit dhe i Gruevskit, e me lidhje të fuqishme politike në Athinë e Beograd.
- Pas kësaj, hë si thoni ju, a ka ndonjë ngjashmëri mes Presidentit të Kilit dhe atij të Shqipërisë, mes Salvador Allendes dhe Ilir Metës?! Në jo, e sigurtë është se qenka tallur me gjithë botën dhe shyqyr që do ta kemi gjallë e shëndoshë si koqja e mollës, për të mirën e Shqipërisë, Ballkanit, Europës dhe mbarë njerëzimit.
- Alpenews.al