Atanur Dogan është turku i parë që pikturon portretin e Heroit tonë Kombëtar Gjergj Kastriot Skënderbeu. Këtë e bëri në ngjarjen më të madhe të akuarelit në rajonin e Ballkanit, me pjesëmarrjen e dhjetëra artistëve nga e gjithë bota që prej disa vitesh zhvillohet në vendin tonë, këtë herë me vendodhje, sallën e Universitetit të Arteve.
“Artisti Helidon Haliti më tha që është një vit i rëndësishëm për ju, “Viti mbarëkombëtar i Skënderbeut”. Mendova, atëherë ai është portreti i duhur”.
E distancon veten nga deklaratat si zyrtare dhe qëndrimet personale të bashkëkombësve të tij kundër figurës së Skënderbeut.
“Unë jam një njeri i zakonshëm i rritur dhe shkolluar në Turqi. E di që ju jeni shumë të ndjeshëm ndaj figurës së Skënderbeut, çdo vend është në të drejtën e tij të mbroj kulturën, historinë dhe figurat përfaqësuese. Situatat në atë kohë ishin që Skënderbeu të luftonte Perandorinë Otomane si kjo e fundit pushtoi shumë vende. Le ta respektojmë historinë”.
Për të mbërritur tek kjo pamje, artisti turk i është referuar disa portreteve të realizuara nga skulptorë të ndryshëm. Imagjinata në “Skënderbeun në akuarel” zë pak vend.
“Si model mora këtë portret, më duket tejet realist, shpreh një karakter të fortë, përcaktues dhe të zgjuar”.
Në portretin e Heroit tonë Kombëtar, pikturimi i syve thotë Atanur Dogan ishte sfida në këtë portret.
“Sytë ishin sfidë më vete, ata duhet të tregojnë një njeri të gatshëm për të mbrojtur vendin e tij, është me të vërtetë një hero”.
Kjo vepër është fillimi i një detyre që artisti turk i vuri vetes në nisje të pikturimit të drejtpërdrejt për publikun e shumtë në sallë. Ajo do të shërbejë si model për realizimin e një pikture në përmasa të mëdha.
