Ditën e sotme do të dalë para trupës gjykuese gjyqtarja, Enkelejda Hoxha, e cila u arrestua dy ditë më parë në një super operacion të SPAK. Report Tv mëson se seanca do të zhvillohet në GJKKO në orën 10:00 për t’u njohur me masën e sigurisë të arrestuarit, mes tyre edhe avokati Aldo Tabaku, kryesekretarja e gjykatës Emanuela Mallkuçi, mjek të dënuar e familjarë të tyre.
Gjyqtarja u arrestua pasi së bashku me bashkëpunëtorët e saj, me në krye Tabakun, kishin krijuar një skemë të mirëfilltë kriminale, që përfundonte me lirimin e të burgosurve.
Report Tv e ka zbardhur totalisht skemën se si funksiononte ky grup kriminal, i cili niste fillimisht me Tabakun. Të dënuarit kujdeseshin fillimisht që si mbrojtës të tyre të zgjidhnin avokatin Aldo Tabaku dhe ky i fundit falë marrëdhënies që kishte krijuar me gjyqtaren Enkeleda Hoxha, mundësonte që të dënuarit të përfitonin uljen e dënimit, kundrejt shumave të parave të dhëna si përfitim i parregullt. Një ditë më parë u publikuan foto, ku gjyqtarja shihet jashtë orarit të punës së bashku me avokatin Aldo Tabaku, në një kohë kur kjo është e ndaluar me ligj. Hetimi ka provuar se gjithë kjo bëhej kundrejt përfitimit të parregullt të shumave të konsiderueshme në Euro, që shkonin nga 6 deri 12 000 euro.
Në lojë, futej edhe sekretarja gjyqësore Emanuela Mallkuci e cila ndërhynte te shorti, me qëllim që kjo çështje gjyqësore të përfundonte në duar e gjyqtares Enkelejda Hoxha. Më pas, eksperti paraqiste në gjykatë akte të ekspertimit psikiatriko – ligjor të rremë. Pra është e njëjta skemë që është përdorur edhe në lirimin e të dënuarve të tjerë nga kjo gjyqtare, mes tyre edhe anëtarin e bandës së Durrësit, Endrit Dokle, që nis që nga avokati, shorti i manipuluar dhe raportet shëndetësore të falsifikuara.
Të arrestuarit
Gjyqtarja Enkelejda Hoxha
Avokati Aldo Tabaku
Sekretarja Manuela Mallakuçi
Eksperti psikiatriko – ligjor Shkëlqim Korbi
I dënuar Sajmir Petani
Vëllai i të dënuarit Bledar Petani
Altin Skëndaj
Gazmir Nezaj
Gentjan Nezaj
Isuf Tanuzi
