Administratori 26-vjeçar i kompanisë “DH Albania”, Avdiol Dobi, duket se është “peshku” i parë që ra në rrjetën e Prokurorisë, ndërsa në ditët në vazhdim, pritet që akuza e kryeqytetit të kërkojë masa të tjera sigurie.
Prokuroria e Tiranës, disa ditë më parë, i është drejtuar Gjykatës me kërkesën që të caktonte masën e sigurisë “Arrest në burg” në mungesë për Dobin. Vendimi është marrë nga gjyqtarja Ardiana Bera, ndërsa i është dërguar për ekzekutim Policisë dhe 26- vjeçari është tashmë në kërkim si person i dyshuar.
Burime thonë se ndaj tij rëndojnë 3 akuza: ajo e mashtrimit, falsifikimit të dokumenteve, si dhe pastrimit të parave. Nga hetimet ka rezultuar se kompania me administrator Avdiol Dobin ka falsifikuar katër dokumente, ndërsa ka arritur të fitojë dy tenderë. Referuar hetimeve të Prokurorisë, burime thonë se Dobi ka kryer disa transaksione të dyshimta, për të cilat është duke u verifikuar nga hetuesit, pasi dyshohet edhe për veprën penale të pastrimit të produkteve të veprës penale.
“ZHDUKJA” E AVDIOL DOBIT
Prokuroria, më herët, kishte lëshuar tri fletëthirrje për të, por në asnjë rast Dobi nuk është paraqitur për të dhënë deklarimet e tij. Burime nga organi i akuzës thanë se, pasi nuk u mor asnjëherë përgjigje nga 26- vjeçari, është urdhëruar shoqërimi i detyruar i tij, por Policia nuk ka arritur ta gjejë atë. Sipas organit të akuzës, referuar të dhënave të siguruara nga sistemi TIMS, Dobi nuk ka dalë nga Shqipëria, të paktën jo në mënyrë të ligjshme. Megjithatë, janë krijuar dyshime se ai mund të jetë larguar në forma të tjera.
HETIMET
Në fillim të dhjetorit, Prokuroria e Tiranës njoftoi se verifikimi kishte nisur për 3 vepra penale. Konkretisht, për atë të “Shpërdorimit të detyrës”, parashikuar nga neni 248 i Kodit Penal, “Falsifikimi i dokumenteve”, parashikuar nga neni 186 i Kodit Penal, si dhe “Shkelje e barazisë në tenderë”, parashikuar nga neni 258 i Kodit Penal.
Ndërkohë që veprimi i parë hetimor ishte dërgimi i një letërporosie autoriteteve amerikane, sekuestrimi i dokumenteve të tenderimit nga institucionet dhe marrja e dëshmive, së fundi, dy drejtuesve. Ndërkohë që Prokuroria e konsideron Dobin si një personazh kyç dhe se dëshmia e tij është shumë e vlefshme, burime pranë saj thonë se janë duke u bërë verifikime edhe për lidhje të “DH Albania” me kompani të tjera, për të parë bashkëpunimin mes tyre.
SKANDALI
Prokuroria e Tiranës u vu në lëvizje pas informacioneve të bëra publike në emisionin “Të Paekspozuarit”, ku rezultonte se kompania “DH Albania”, e cila kishte fituar tenderin për të bërë një lot në rindërtimin e Unazës së Re, kishte falsifikuar datën e krijimit të saj.
Nga 2018, që është koha e themelimit të kompanisë, në bazë të dokumenteve të bëra publike, dyshohet se është falsifikuar dhe është paraqitur viti 1998, si kohë e krijimit. Por më tej, kjo kompani dyshohet se ka bërë edhe falsifikimin e firmës së Sekretarit të Shtetit të Delaware, Jeffrey Bullock, për të qenë më bindëse dhe duke fituar kështu tenderin për një pjesë të rrugës.
Në hetim një numër zyrtarësh të ARRSH, OST dhe ministrisë
Ndërkohë që pas dy muajsh nga skandali i publikuar në emisionin “TPZ”, në “News 24”, Prokuroria kërkoi arrest në burg për Avdiol Dobin, burime thonë se nën hetim janë edhe zyrtarë të ARRSH-së dhe OST-së, ndërsa pritet që në vazhdim të merren masa të tjera sigurie. Pjesë e hetimit të organit të akuzës është edhe Ministria e Infrastrukturës dhe Energjisë, kjo për të verifikuar të gjitha parregullsitë e vërejtura në procedurën për marrjen e licencës nga ana e kompanisë, e cila më vonë do të fitonte dy tenderë në vlerën rreth 30 mijë euro.
Ndërkohë, kujtojmë se tri ditë më parë, ministrja e re e Infrastrukturës dhe Energjisë shkarkoi nga detyra si drejtorin e ARRSH-së, Afrim Qëndro, ashtu dhe atë të OST-së, Klodian Gradeci. Të dy ish-zyrtarët dëshmuan një javë më parë në Prokurorinë e Tiranës, së bashku me disa punonjës të tjerë të institucioneve. Ndërkohë, burime sqarojnë se në hetim janë edhe anëtarët e Komisionit të Vlerësimit të Ofertave (KVO).
