Partia Socialiste ka mbledhur sot kryesinë në Shkodër nën drejtimin e të deleguarit, Arben Pëllumbi, i cili ka thënë se me vendim të kryesisë është shkrirë struktura e partisë në këtë qytet.
Mbledhja është shoqëruar me debate mes anëtarësisë, ndërsa të pranishëm ishin edhe deputetët Senida Mesi dhe Luan Harusha.
Deputeti i PS, Arben Pëllumbi, tha pas mbledhjes se nuk mund të ketë zgjedhje në Shqipëri pa ndryshuar Kodin Zgjedhor.
“Jemi dorë e shtrirë për të bashkëpunuar me opozitën. Nuk mund të ketë zgjedhje qoftë edhe të 2021 nëse nuk materializojmë ndryshimet e kodit zgjedhor që janë kërkuar të paktën nga OSBE. Rruga e këtyre ndryshimeve për kodin zgjedhor kalon përmes komisionit në parlament. Basha mori akt ekstrem që rezultoi i dështuar. Duhet të kërkojnë falje për atë që bënë pastaj të heqin ultimatumet dhe lëvizjen e Bashës e shoh si një tërheqje nga ultimatumet. Që ta kalojmë në çfarëdo lloj zgjedhjesh kemi nevojë për kod të ri zgjedhor dhe pa instaluar kulturën që humbesi t’i japë dorën fituesit dhe ta lejojë fituesin të bëjë qeverisjen e tij, ne nuk mbërrijmë në ndonjë gjë. Nuk është as kodi dhe as sistemi ai që i bën një pal zgjedhje më të mira ose më të këqija. Eshtë mënyra se si ne i zbatojmë dhe se si ne sillemi ditën e nesërme, a vemë Shqipërinë apo partinë mbi të gjitha”, mësohet të ketë thënë ai.
