Mediat e rajonit kanë evidentuar krizën politike në Shqipëri dhe luftën për pushtet që ka shpërthyer mes Presidencës dhe qeverisë, përsa i përket dhe politikës së jashtme.
Gazeta “Klix” shkruan se Presidenti shqiptar ka mbërritur në Bosnje për të marrë pjesë në samitin e ministrave të rajonit, përkundër vendimit të qeverisë për të bojkotuar këtë takim, në solidaritet me Kosovën.
“Presidenti shqiptar Ilir Meta mbërriti në Jahorina sonte. Meta vendosi të vijë pavarësisht nga një vendim i mëparshëm i Ministrisë së Punëve të Jashtme të Shqipërisë që anuloi pjesëmarrjen në Samitin e ministrave.
Ministri shqiptar Gent Çakaj bojkotoi takimet në Sarajevë, sepse, siç tha ai, është solidaritet me Kosovën.
Ai njoftoi në Tëitter se “qëndrimi i organizatorit të samitit ndaj Kosovës është i papranueshëm dhe se është në kundërshtim me qëllimin e krijimit të një atmosfere besimi, marrëdhëniesh të mira fqinjësore dhe stabilitetit”.
Meta nesër do të marrë pjesë në seancën plenare të Samitit të Procesit të Bashkëpunimit të Evropës Juglindore (SEECP) në Jahorinë, duke i dhënë fund një presidence një vjeçare të BiH në këtë nismë rajonale.
Iniciativa Rajonale e SEECP u nis në Sofje më 1996 me qëllim të forcimit të bashkëpunimit rajonal, sigurisë dhe stabilitetit”,shkruan kjo media.
