Ndërsa mediat e huaja kanë hedhur dyshime për nxitjen e valës së protestave që ka pushtuar Ballkanin nga Rusia, Ministri i Jashtëm Rus, Sergei Lavrov ka bërë sot një deklaratë të çuditshme.
Në prag të samitit të Bashkëpunimit Ekonomik të Detit të Zi, një vend anëtar të së cilës është edhe Shqipëria, Lavrov ka deklaruar sot “se situata në rajon është duke degraduar”.
Lajmi i tij u raportua nga Agjensitë Zyrtare e Lajmeve e Rusisë, “Inter Tass”, “Ria Novosti” dhe nga “Sputnik”.
Ndonëse Lavrov nuk përcaktoi me emër Shqipërinë në deklaratën e tij, referenca e shumëfishtë e adresuar ndaj disa prej anëtarëve të kësaj organizate që janë përfshirë gjithashtu nga protesta, midis tyre Shqipëria, Serbia dhe Rumania, duket si një mesazh i koduar ndaj përkrahësve të kësaj lëvizje.
BEDZ-ja ka në gjirin e saj 12 anëtarë, Azerbajxhanin, Armeninë, Shqipërinë, Gjeorgjinë, Moldavinë, Rusinë, Rumaninë, Serbinë, Turqinë dhe Ukrainën.
Dy ditë më parë, mediat e huaja shkruanin se ekzitojnë dyshime të forta që Rusia është duke sponsorizuar një valë protestash të cilat kanë përfshirë aktualisht të gjithë Ballkanin për të sfiduar pushtetin e qeverive pro-perëndimore.
Aktualisht, përveç Shqipërisë, në rajon po organizohen protesta edhe në Malin e Zi, Serbi apo Rumaninë. Më parë gjatë kësaj jave, disa mijëra persona pushtuan rrugët e Podgoricës, pas arrestimit të një deputeti në opozitë.
Opozita malazeze njihet për lidhjet e saj të ngushta me Rusinë, për financimet e drejtëpërdrejta nga Kremlini dhe për rolin e luajtur ndaj tentativës për grusht shteti në vitin 2016, një tentativë e sponsorizuar drejtpërsëdrejti nga GRU, Shërbimet Inteligjente Ushtarake Ruse.
Grushti i shtetit i organizuar në vendin fqinj kishte si qëllim që të pengonte Malin e Zi, një hallkë strategjike në interesat e Rusisë, që të anëtarësohej në NATO, një kauzë të mbrojtur nga demokratët sot në opozitë.
Ndërkohë, vala e protestave ka përfshirë përveç Shqipërisë, edhe Rumaninë dhe Serbinë.
Mediat rumune gjejnë lidhje të drejtëpërdrejta midis këtyre manifestimeve dhe Rusisë, me Ludovik Orban, kreun e opozitës rumune, që ka treguar në të shkuarën një qëndrim dashamirës ndaj qeverisë së Presidentit Putin.
Rumania është një vend i Bashkimit Europian dhe destabilizimi i saj do të ishte një efekt i dëshiruar në Kremlinin, për të krijuar një efekt gjithmonë edhe më të madh pakënaqësie ndaj Unionit.
Sipas shtypit rumun, gjithçka nisi me protestat e organizuara në Francë, ku pretekst për pushtimin e shesheve ishte një taksë e re mbi karburantin.
Megjithatë, Marine le Pen, liderja e partisë më të madhe në opozitë, euroskeptikëve të Frontit Popullor, ka shprehur hapur admirimin e saj për politikat e Presidentit Putin.
Gjatë fushatës presidenciale të vitit 2017, kur Le Pen arriti një rezultat historik duke kaluar në raundin e dytë përballë Macron, në të fitoi 35% të votave, në Francë u krijua një debat i madh mbi faktin që partia e saj kishte pranuar një sponsorizim të drejtëpërdrejtë prej 9 milionë eurosh prej rusëve.
Në Shqipëri, lëvizja e nisur nga studentët së fundmi po përpiqet të uzurpohet prej partive politike.
Dyshohet që pas këtij skenari, mund të ketë gjithashtu disa “indicie” ndërkombëtare.
Një vit më parë, Partia Demokratike u përfshi në një skandal të financimeve nga parajsat fiskale. Mediat amerikane provuan se Basha kishte pranuar në fushatë një milionë dollarë sponsorizime nga disa oligarkë rusë, pasuria e të cilëve ishte fshehur në Belize dhe disa destinacione të tjera të njohura për një regjim fiskal të relaksuar, që favorizon pastrimin e parave.
Pavarësisht denoncimeve të vazhdueshme, Lulzim Basha refuzoi të komentonte rreth këtij skandali.
