Ministrja e Shëndetësisë dhe Mbrojtjes Sociale Ogerta Manastirliu, është shprehur gjatë një interviste televizive se vendi nuk ndodhet në epidemi, por ka aktivitet me intensitet mesatar të qarkullimit të gripit.
“Gripi cilësohet si grip A dhe nëngrupi H1N1. Por mos ta ngatërrojmë me gripin e derrit. Është një virus sezonal normal”, u shpreh Manastirliu.
Sa i përket situatës së fruthit, Manastirliu u ka bërë apel prindërve të vaksinojnë fëmijët sipas kalendarit kombëtar të vaksinimit.
“51 raste janë konfirmuar nga 121 të dyshuara. Fruthi edhe në vendin tonë qarkullon si në të gjitha vendet e rajonit dhe të Europës. Kalendari i vaksinimit tek fëmijët është i detyruar. Sidomos ata nën 2 vjeç. Ndaj u bëj apel prindërve të mos hezitojnë të kryejnë vaksinimin e fëmijëve, apo mos e neglizhojnë atë”, theksoi ministrja Manastirliu.
