Ministria Ogerta Manastirliu në një komunikatë për mediat këtë të enjte ka sqaruar situatën e koronavirusit në vendin tonë. Ajo shprehet se java e 46-të e pandemisë që nga fillimi ka regjistruar numrin më të lartë të personave që kanë humbur jetën për shkak të koronavirusit.
Ndërkohë përsa i përket shifrave të të infektuarve, ajo thotë se incidenca e infektimit në Shqipëri është më e ulëta në rajon.
“Më lejoni të ndalem shkurt të situatës epidemiologjike në vend. Aktualisht kemi të konfirmuara me COVID në total prej 29.837 rastesh me një incidencë 1042 raste për 100 mijë banorë. Duke bërë një krahasim me rajonin, kjo incidencë është më e ulët se sa incidenca mesatare e rajonit dhe Europës. Prej rasteve të konfirmuara në javën e 46, 52 % janë femra dhe 48 % meshkuj. Përsa i përket fataliteteve, aktualisht kemi 646 humbje jete që korrenspondojnë 22.7 vdekje për 100 mijë banorë. Vlerësohet se java e 46-të është java me numrin më të lartë të vdekshmërisë. Situata në spitale në 3 strukturat e dedikuara aktualisht, kemi të zëna 420 shtretër, rreth 20 përqind është e lirë. Struktura e katërt është gati për pacientët” – tha ministrja.
Ajo foli dhe për masat e ndërmarra që nga fillimi i pandemisë.
“Nëse do kalonim shkurt në vendimet e ndërmarra të ekspertëve sa i përket mbylljes së parë dhe më pas përfshirjes së masave më të ulëta. Kemi marrë 13 masa përgjatë gjithë kësaj periudhe 9 mujore duke filluar nga marsi me vendosjen e masave të izolimit total. Në prill vendosëm hapjen e aktiviteteve me rrezikshmëri të ulët, më 18 maj ku kishim vetëm 2 raste në ditë, është bërë faza tjetër e rihapjes ku të gjithë aktiviteteve ekonomike u hapën. Nga 1 qershori u bë hapja e madhe është lejuar gjithë lëvizja e qytetarëve në të gjithë vendin pa asnjë kufizim” – tha Manastirliu.
