Prokurori i Apelit për Krimet e Rënda, Bujar Sheshi është zgjedhur si anëtar i Këshillit të Lartë të Prokurorisë.
Prokurori Sheshi ishte i vetmi që kandidoi për fazën e dytë të KLP-së, futja në garë e të cilit ka nxjerrë nga ngërçi organin në fjalë, pasi i mungonte një kandidat nga Prokuroria e Apelit.
Për shkak të moskandidimit, Prokurorja e Përgjithshme e Përkohshme Arta Marku e hapi dy herë garën për prokurorët. Gara e parë dështoi sepse nuk pati asnjë kandidaturë, ndërsa gara e dytë rezultoi e suksesshme pikërisht për shkak të kandidimit të prokurorit të vetëm Bujar Sheshi.
Kandidimi i prokurorit të Apelit të Krimeve të Rënda, Bujar Sheshi, erdhi vetëm pak ditë pas konfirmimit të tij në detyrë nga Komisioni i Pavarur i Kualifikimit më 24 tetor.
Rëndësia e Këshillit të Lartë të Prokurorisë është mjaft e madhe pasi nga 6 anëtarët prokurorë do të dalë edhe emri i ri i Prokurorit të Përgjithshëm.
