Siguria në punë, respektimi i ligjit në deklarimin punëmarrësve si dhe një bashkëpunim mes aktorëve shtet-punëdhënës-punëmarrës do të siguronte zhvillimin e një shoqërie, sipërmarrjeje dhe ekonomi të qëndrueshme. Këtë fakt bëri me dije Ministra e Financave dhe Ekonomisë, Anila Denaj, gjatë mbledhjes së Këshillit Kombëtar të Punës. Gjatë fjalës së saj, ministrja Denaj i kushtoi një vëmendje të veçantë çështjes së sigurisë në punë dhe u shpreh se krijimi i kushteve të favorshme për sigurinë e punonjësve është domosdoshmëri për të pasur një zhvillim ekonomik të qëndrueshëm.
“Shëndeti dhe siguria në punë e punonjësve mbetet një detyrim për çdo kompani private e publike dhe në vëmendjen tonë, veçanërisht të Inspektoratit të Punës, do të mbetet përmirësimi i kushteve dhe standardeve që garantojnë sigurinë maksimale për punonjësit”, u shpreh Denaj. “Gjatë vitit 2019 – theksoi ministrja Denaj – vëmendja do të jetë te përmirësimi i marrëdhënies me biznesin dhe ndërgjegjësimi për vëmendje ndaj sigurisë së shëndetit të punëmarrësit dhe kushteve të punës, sigurimin e transparencës në vendimmarrje dhe rritjen profesionale të inspektorëve”. Të pranishëm në këtë mbledhje ishin edhe ministri i Shtetit për Mbrojtjen e Sipërmarrjes, z. Eduard Shalsi; ministri i Turizmit dhe Mjedisit, z. Blendi Klosi; zv.ministrja e Shëndetësisë dhe Mbrojtjes Sociale, znj. Bardhylka Kospiri; zv.ministri i Infrastrukturës dhe Energjisë, z. Ilir Bejtja etj