Një i ri nga Italia është arrestuar sot nga policia kufitare e Kakavijës, pasi është kapur me kokainë në makinë.
Burime zyrtare bëjnë me dije, së në pranga ka rënë 26-vjeçari D. G., banues në Siçili, të cilit i është zbuluar lënda narkotike në dalje të Republikës së Shqipërisë, gjatë kontrollit në vijën e dytë.
“Shërbimet e Policisë Kufitare Kakavije, si rezultat i shtimit të kontrolleve me qëllim parandalimin dhe goditjen e paligjshmërisë, bazuar dhe në analizën e riskut, në dalje të RSH-së, kanë kaluar për kontroll në vijën e dytë automjetin Camper “Fiat” që drejtohej shtetasi italian D. G., 26 vjeç, banues në Siçili.
Gjatë kontrollit të ushtruar në automjet, nga shërbimet e Policisë Kufitare, u gjetën disa doza me lëndë të dyshuar narkotike kokainë.
Në cilësinë e provës materiale u sekuestruan lënda narkotike, automjeti dhe 1 aparat celular.
Në përfundim të veprimeve të kryera nga specialistët për Hetimin e Narkotikëve në DVP Gjirokastër u bë arrestimi në flagrancë i shtetasit D. G., 26 vjeç, banues në Siçili”, njofton policia.
Materialet i kaluan Prokurorisë Pranë Gjykatës së Shkallës së Parë Gjirokastër për veprën penale “Trafikim i lëndëve narkotike”.
