Të jesh i lumtur duket misioni më i vështirë për t’u përmbushur.
Me ritmin dhe jetën frenetike njerëzit po humbasin kënaqësitë e vogla të jetës duke u gllabëruar nga monotia e në fund të ditës nuk ka asgjë për t’u mbajtur mend!
Të biesh në humnerën e depresionit po bëhet shumë më e lehtë dhe gjithnjë e më shumë njerëz po kurohen pa recetë mjeku me ilaçe antidepresive.
Pa dashur të përcaktojmë më tej se çfarë është depresioni e simptomat e tij, Living do të ndajë me ju ushqimet konsumi i të cilave thjesht do t’ju bëjë më të lumtur pa rënë në grackën e tij.
- Acidet yndyrore Omega-3
Ushqimet e pasura me acide yndyrore Omega-3 luajnë një rol të rëndësishëm në zhvillimin e sistemit nervor qendror (SNQ).
Ato ekuilibrojnë sekretimin e substancave kimike duke ulur në këtë mënyrë rrezikun e plakjes së parakohshme të tij, rrisin nivelin e serotoninës dhe në të njëjtën kohë ulin nivelet e kortizolit.
Rrisni konsumin e këtyre acideve çudibërëse duke përfshirë në regjimin tuaj ushqimor: vajin e ullirit, të gjitha llojet e frutave të thata, vaji i kokosit dhe bajames, peshqit etj.
- Vitamina D
Mungesa e vitaminës D jo vetëm që rrit rrezikun e shfaqjes së problemeve të kockave, por është e lidhur ngushtë edhe me shfaqjen e depresionit.
Dielli është një ndër burimet kryesore të vitaminës D, por ju mund ta merrni atë edhe duke konsumuar ushqimet e mëposhtme: vaj i mëlçisë së merlucit, vezë, kërpudha, drithëra dhe produktet e sojës.
- Zinku
Një tjetër element që luan një rol të rëndësishëm në mirëfunksionimin e sistemit nervor është zinku, por edhe në 200 procese biokimike që rregullojnë veprimtarinë e organeve kryesore.
Burimet kryesore të zinkut janë mishi i kuq, frutat e detit, farërat, drithërat integrale etj.
- Magnezi
Për fat të keq magnezi është një ndër mirealet që përthithet me shumë vështirësi nga organizmi. Ai luan një rol të rëndësishëm në trajtimin e depresionit pasi rrit prodhimin e serotoninës dhe dopaminës, si dhe ul prodhimin e kortizolit, njohur ndryshe si hormoni i stresit.
Magnezi gjendet në shumicë tek bananet, bishtajoret, farat e kungullit, avokadot, bajamet dhe algat e detit.
