Me debate të forta, që solli deri në përjashtimin e një prej avokatëve mbrojtës, u karakterizua seancë e kësaj të mërkure në GJKKO për ish ministrin Fastmir Mediut për masakrën e Gërdecit.
Në seancë ishte parashikuar marrja në pyetje e 5 ekspertëve që kanë përcaktuar dëmin ekonomik të shkaktuar nga shpërthimi i 15 marsit 2008, Bexhed Zeqiri- financier kontabël, Ymer Stafa-ekonomist financiar, Rasim Metallari- financier, Latif Çela- financier, dhe Mondi Hoxha- punonjës në sektor privat.
Që në fillim ekspertët kërkuan kohë që të mund t’i jepnin përgjigje të gjitha pyetjeve për shkak se do të duhej të konsultoheshin, po gjykata tha se këtë mund ta bënin në seancë.
Nga ky moment filloi një përplasje e ashpër, pasi avokati i Mediut Ardian Visha filloi t’i bënte pyetje ekspertit Zeqiri, të cilat GJKKO i konsideronte si pyetje të papranueshme.
Edhe pse Gjykata i tërhoqi vëmendjen disa herë, Visha nuk u tërhoq derisa gjyqtarja Gjoka vendosi përjashtimin e tij nga seanca për shkelje të Kodit të Etikës.
Gjykata çmoi se për shkak se akti i ekspertimit është voluminoz dhe fakti që është përpiluar nga 5 ekspertë si dhe kohen e gjatë që ka kaluar që ne 2008, u lë kohën ekspertëve që të konsultohen me shënimet dhe dokumentet e tjera.
Gjykata vendosi që të procedojë me depozitimin e pyetjeve me shkrim nga palët dhe pastaj me paraqitjen e tyre po me shkrim pas konduktimit, ne kushtet kur kemi të bëjmë me grup ekspertësh, pasi përgjigja kërkon një konsultim te përbashkët me grupin e ekspertëve. Sa më sipër, gjykata vendosi qe të ndërpresë shqyrtimin gjyqësor dhe të shtyjë seancën në një datë tjetër për t’i dhënë mundësi palëve dhe ekspertëve. Ftohen palët të paraqesin pyetjet me shkrim.
Lajmi në përditësim…
