Vijojnë fyerjet dhe kërcënimet mes Rexhep Tajip Erdoganit dhe Benjamin Netanjahut.
Kryeministri izraelit e ka quajtur udhëheqësin turk “një kasap” pasi Erdogani e quajti atë “terrorist” mbi përdorimin e forcës së IDF në Gaza.
Armiqësia mes Netanjahut dhe Erdoganit kulmoi të dielën, kur presidenti turk akuzoi kryeministrin izraelit se është “terrorist” në fjalimin e tij televiziv.
“Ne nuk kemi turpin e pushtuesve mbi vete, Netanyahu. Ju jeni pushtues dhe tani jeni të pranishëm në ato vende si pushtues e në të njëjtën kohë jeni edhe terroristë”, shtoi Erdogan.
Netanjahu menjëherë iu përgjigj me një replikë të ashpër.
“Erdogan nuk është mësuar me bisedime, duhet të fillojë të mësohet me të. Ai që ka okupuar Qipron e Veriut dhe rajonin kurd, dhe bën kasaphanë me civilët në Afrin, nuk duhet të na bëjë leksione ne për moralin dhe vlerat”, tha kryeministri izraelit.
REPLIKAT DJE
Erdoğan ka reaguar ndaj deklaratës së kryeministrit izraelit, Benjamin Netanyahu, se “ushtarët turq në Afrin kanë përndjekur të shtypurit”.
“Netanyahu, ju jeni shumë i dobët, jeni shumë i çuditshëm. Kujdesuni për veten tuaj një herë. Ne merremi me terroristët, por qëllimi yt nuk janë terroristët. Sepse ti je një shtet i terrorit”, tha presidenti turk, gjatë një fjalimi të mbajtur në kongresin e AK Partisë në qytetin Adana të Turqisë.
“Ju nuk keni njeri që t’ju dojë në një mënyrë të drejtë. Është shumë e qartë përgjigja që more nga Kombet e Bashkuara në lidhje me hapin që ndërmorët për Kudsin. Gjithashtu mos u mburr se ‘unë kam armë bërthamore’. Sepse vjen një ditë që as ato armë bërthamore nuk punojnë”, ka shtuar më tej Erdoğan.
Presidenti i Turqisë ka theksuar se do t’i ndjekin anëtarët e FETO-s kudo që të ndodhen dhe është shprehur se “Shërbimi Inteligjent Turk (MIT) i paketoi dhe solli në vend 6 prej anëtarëve të FETO-s nga Kosova. Gjithashtu edhe ai në Pensilvani, do të qëndrojë në arrati deri në një kohë, dhe këtu do të vijë”.
“Ata që shqetësohen nga valëvitja e flamurit tonë në rajonet që ne i kemi pastruar nga terrorizmi, as që flasin për leckat e organizatës që valëviteshin më parë në po të njëjta territore. Ata nuk flasin për këtë sepse problemi i tyre është Turqia, nga kjo kanë dhimbje”, tha Erdoğan.
