Katër shqiptarë në Belgjikë e kanë tepruar me guximin e tyre pasi kishin ngritur një shtëpi të vërtetë bari përballë një komisariati policie.
Teksa dhjetëra policë kalonin çdo ditë në rrugën pranë për të shkuar në punë, shqiptarët rrisnin të pashqetësuar bimët narkotike, duke menduar se autoriteteve nuk do t’i shkonte aspak në mend së dikush mund të mbante sasi të madhe droge nën hundën e tyre.
Por gjithçka u zbulua dhe të katër shqiptarët tashmë janë vënë në pranga nën akuzën e kultivimit të bimëve narkotike.
Ngjarja raportohet të ketë ndodhur rreth muajit shkurt, por vetëm tani është bërë publike, dhe mediat belge deklarojnë se gjithçka u zbulua vetëm për shkak të faturës së lartë të energjisë që shkonte në shtëpinë përballë komisariatit, që harxhohej për ngrohjen e bimëve të kanabisit.
Tashmë këta shqiptarë të arrestuar do të përballen me drejtësinë për kultivimin e bimëve narkotike. Ata do të dalin në gjykatë të hënën e ardhshme. Drejtuesi i tyre rrezikon deri në 2 vite burg.
