Pas përpjekjeve intensive të forcave të emergjencës, situata nga zjarret në rang vendi paraqitet më e stabilizuar, megjithëse 29 vatra nga 57 të raportuara në 24 orët e fundit vijojnë të jenë aktive.
Vatra më problematike ndodhen në qarqet Vlorë, Berat, Dibër, Elbasan, Tiranë, Gjirokastër dhe në disa zona malore të mbrojtura.
Në qarqet e jugut, veçanërisht në Vlorë, vazhdon operacioni në Syrin e Kaltër, ku janë angazhuar qindra forca nga zjarrfikësit, ushtria dhe autoritetet vendore. Zjarre të tjera janë aktive në zonat Finiq, Himarë, Selenicë dhe Dropull.
Në Berat, zjarret në fshatin Plashnik rrezikuan banesa, duke detyruar evakuimin e 20 banorëve. Dy helikopterë nga Emiratet e Bashkuara Arabe janë përfshirë në operacionet ajrore për të ndihmuar në shuarjen e flakëve.
Ministria e Mbrojtjes deklaron se situata monitorohet në vijimësi nga të gjitha strukturat vendore dhe qendrore, ndërsa në zonat më të rrezikuara janë angazhuar trupa shtesë për të evituar dëmet ndaj banesave dhe mjedisit.
