Krerët e Kosovës dhe Shqipërisë flasin në vazhdimësi për thellim të bashkëpunimit dhe mbajnë mbledhje të përbashkëta të qeverive, por kur vije koha e gjithë kjo të shndërrohet në vepra dalin pengesa.
Këtë e dëshmon edhe mos marrja e një vendimi për ndarjen e një parcele për Ambasadën e Shqipërisë në Prishtinë.
Dhe duke parë mosmarrëveshjet në Kuvendin Komunal të Prishtinës, Shqipëria është tërhequr përkohësisht nga kërkesa e saj për ndërtimin e ambasadës në parcelën e lulishtes së “Hortikulturës”, që ndodhet në rrugën “Fehmi Agani” te “Qafa”.
Megjithëse në Ambasadë nuk kanë dashur të flasin për këtë gjë, në Komunën e Prishtinës e kanë konfirmuar tërheqjen për gazetën “Koha Ditore”.
Dy vjet më parë, kreu i Prishtinës Shpend Ahmeti thirri seancë të jashtëzakonshme për t`ia ndarë Shqipërisë këtë parcelë, porse vendimi u kundërshtua nga ana e LDK-së me arsyetimin se në kohën e qeverisjes së Isa Mustafës në Prishtinë, kjo parcelë ishte dedikuar për ndërtimin e selisë së LDK-së.
Kujtojmë se aktualisht Ambasada e Shqipërisë është e vendosur në një objekt me qera në rrugën “Lorenc Antonti” në lagjen “Pejton” të Prishtinës.
