Varianti Omicron i koronavirusit e ka vendosur sistemin shëndetësor në një situatë më të vështirë për shkak të fluksit të madh të njerëzve të infektuar. Kështu u shpreh mjekja pneumologe Silvana Sadria në studion e “Dita Jonë”, e cila theksoi se izolimi dhe respektimi i masave tani kanë më shumë vlerë se asnjëherë.
“Nuk jemi më në ato situata fillestare të pandemisë. Omicron na ka vënë në një situatë më të vështirë, me fluksin e madh të njerëzve sepse nëse është një pjesëtar i familjes i infektuar, brenda pak ditësh shume shpejt infektohet e gjitha familja. Numrat janë rritur shumë dhe statistikat janë edhe më shumë se aq, masat tani kanë më shumë vlerë se asnjëherë se përhapja është shumë e shpejtë. Personeli shëndetësor është në gatishmëri. Tjetër vështirësi është edhe gripi stinor që vitin e kaluar nuk e kishim dhe duhen analiza laboratorike. Simptomat janë pak a shumë njësoj dhe ky është paniku që i kap. Izolimi dhe masa më shumë se asnjëherë ka vlerë te ky variant se e gjithë periudha është 3-5 ditë dhe negativizimi është shumë shpejt”.
Ajo tha se për shkak të fluksit të madh të të prekurve nga ky variant, numri i vizitave në ditë ka arritur në 50-60 nga 10 që ka qenë norma ligjore mesatare.
“Norma ligjore mesatare është 10 pacientë në një turn, ndërkohë tani shkojnë edhe 50-60. Ne shpesh jemi të lodhur dhe s’ kemi kohë as për t’u sëmurur. Ne e kemi kaluar të gjithë Covid në stafin e Dispanserisë, përveç meje. Jemi të gjithë të vaksinuar”.
Mjekaj Sadria apeloi për kujdes të shtuar pasi përpos variantit Omicron ka ende të prekur me variantin Delta i cili është gjithashtu në qarkullim.
Sa i përket Covidit të gjatë, ajo nënvizoi se më shumë vështirësi kanë hasur me pacientët e sëmurë me diabet dhe sëmundje imune për rikuperim.
“Pasi kalon faza akute që shpëton jetës dhe ata që e kalojnë lehtë të gjithë rikthehen te pneumologu, se kjo sëmundje ka prekur bazën e pjesës së pulmonit dhe ka lënë një fibrozë që duhet testuar kapaciteti pulmonar. Ka pacientë që janë rikthyer në gjendjen e mëparshme. Periudha më e vështirë është e rikuperimit. Ka pasur pacientë që kanë ndenjur shumë me oksigjen sidomos ata me diabet, po dhe te këta kemi pasur më shumë vështirësi. Rikuperimi vazhdon”.
