OBSH ka publikuar rekomandimet e saj të reja mbi trajtimet dhe vaksinat që mund të përdoren për të luftuar shpërthimin e Ebolës në Republikën e Kongos, ku autoritetet shëndetësore po përballen me një përhapje të variantit Bundibugyo të virusit.
Njoftimi u bë gjatë vizitës së Drejtorit të Përgjithshëm të OBSH-së në Bunia, kryeqendra e provincës Ituri dhe epiqendra aktuale e shpërthimit. Sipas OBSH-së, ekspertët kanë vlerësuar një sërë trajtimesh dhe vaksinash potenciale për parandalimin dhe trajtimin e sëmundjes.
Për trajtimin e pacientëve të konfirmuar me Ebola, ekspertët rekomandojnë zhvillimin e provave klinike me antitrupat monoklonalë MBP134 dhe Maftivimab, si dhe me antiviralin remdesivir. Gjithashtu po shqyrtohet një terapi e kombinuar që përfshin antitrupa dhe ilaçe antivirale.
Sa i përket vaksinave, kandidati më premtues konsiderohet vaksina rVSV Bundibugyo, e zhvilluar nga International AIDS Vaccine Initiative. Sipas OBSH-së, do të duhen edhe shtatë deri në nëntë muaj përpara se vaksina të jetë gati për prova klinike te njerëzit.
Një tjetër vaksinë në zhvillim, ChAdOx1 Bundibugyo, e krijuar nga University of Oxford dhe Serum Institute of India, mund të jetë e disponueshme për testime brenda dy deri në tre muajve të ardhshëm, megjithëse nevojiten ende të dhëna shtesë mbi sigurinë dhe efektivitetin e saj.
OBSH vuri në dukje se vaksina Ervebo, e përdorur kundër variantit Zaire të Ebolës, nuk duket të ofrojë mbrojtje efektive ndaj variantit Bundibugyo që po qarkullon aktualisht.
Ndërkohë, organizata po bashkëpunon me autoritetet e Republikën e Kongos dhe Ugandën për të zhvilluar protokolle të përbashkëta testimi për trajtimet dhe vaksinat e propozuara.Pavarësisht përparimeve shkencore, OBSH thekson se prioriteti kryesor mbetet ndërprerja e zinxhirit të transmetimit përmes diagnostikimit të shpejtë, izolimit të rasteve, gjurmimit të kontakteve, kujdesit ndaj pacientëve dhe ndërgjegjësimit të komuniteteve.
Sipas të dhënave më të fundit të CDC Africa, në Republikën Demokratike të Kongos janë regjistruar mbi 1,000 raste të dyshuara me Ebola, ndërsa 246 persona kanë humbur jetën nga sëmundja.
