Specialistët e Organizatës Shëndetësore të Kontrollit dhe Mbrojtjes së Greqisë janë në alarm nga shpërthimi i epidemisë së fruthit në Atikë e Peloponez. Nga muaji maj vihet re një përhapje masive e sëmundjes në të gjitha moshat. 109 raste janë shënuar vetëm 2 javët e fundit të nëntorit, ndërsa nga muaji maj janë regjistruar 604 të prekur. Këto janë vetëm rastet e rënda të shënuara, pas kurimit të pacientëve, pasi shumica e kalojnë me kujdes shtëpiak e trajtim privat mjekësor.
Mosha mesatare e shumicës së të prekurve është 25-44 vjeç, mes tyre mjaft të punësuar në sektorin e mjekësisë që nuk ishin vaksinuar. Epidemia shënoi dhe viktimën e parë, një foshnje rome humbi jetën pasi nuk ishte vaksinuar.
Epiqendra e epidemisë është zona e mbipopulluar e Atikës, si dhe gadishulli i Peloponezit, por tashmë specialistët paralajmërojnë se epidemia do të përhapet në gjithë vendin.
Autoritetet pranojnë zyrtarisht epideminë në vend, duke deklaruar njëkohësisht se Greqia është e mbrojtur dhe se në sistemin vaksinal të moshave të mitura parashikohet normalisht në dy doza, deri në moshën 6-vjeçare, pra kur fillojnë shkollën. Gjithashtu, thekson se është shumë e rëndësishme të mos neglizhohet me vaksinimin, një tendencë që fatkeqësisht vihet re vitet e fundit.
Me gjithë panikun që ka zënë prindërit në çdo kënd të Greqisë, me mjaft prej tyre të nxitojnë tek pediatri për informacion e vaksinim minutën e fundit, ekziston dhe një përqindje, në rritje vitet e fundit, që i konsideron vaksinat shkaktare të problemeve mendore e fizike tek fëmijët dhe hezitojnë të ndjekin rregulloren, duke i ekspozuar të miturit para çdo lloj epidemie, pa asnjë mbrojtje.
Fruthi mund të shkaktojë mjaft sëmundje serioze, si pneumonia, otitis, encefalopatis e një sërë pasojash të tjera serioze për shëndetin.