Spoti i “Xing me Ermalin” ku njoftohej se i ftuar ishte kryeministri Edi Rama çmendi rrjetin për disa ditë rresht. U komentua shumë oxhaku që shfaqej në studion ku kryeministri po pikturonte dhe u vu në shënjestër çmimi i tij 18 mijë euro.
Rama reagoi me një status në Twitter ku bënte të ditur se ndodhej në shtëpinë e shokut të tij.
“Qenka mbushur kazani i plehrave të pas festës së Vitit të Ri me oxhakun tim kozmik, që kadrinjtë e kanë zbuluar me rreze lazer në spotin e Ermalit. Eh,ja që s’është as oxhaku as shtëpia ajo, po atelieja e mikut tim qeramist, ku bujarisht jam i mirëpritur për orët e mia krijuese”, shkruante Rama.
I ftuar mbrëmjen e sotme në “Xing me Ermalin”, moderatori e pyeti kryeministrin: “Ç’janë këta shokë që kanë oxhak 23 mijë euro?”
“S’është oxhaku im. Sa herë do thuhet do rritet çmimi. Shko pyet shokun, është artist, qeramist, ka 30 vjet që punon, tani unë s’i kërkoj llogari ku e ke gjetur derën, ku e ke gjetur oxhakun”, u shpreh kryeministri duke shtuar se ligji anti-shpifje është në proçes.
