Prej ditësh beteja që po zhvillohet në Bakhmut ka qenë intensive, ndërkohë që autoritetet ukrainase kanë vënë në vijimësi alarmin në lidhje me civilët të cilët janë bllokuar në qytet.
Ndërkohë ushtarët ukrainas raportojnë për trupa civilësh të vrarë në rrugët e qytetit, por deklarojnë se marrja e trupave të tyre është e pamundur për shkak të intensitetit të betejës që po zhvillohet në qytetin lindor.
Duke folur për Sky Neës me telefon, Khalid Makiazho, pjesë e një batalioni çeçen që mbështet Ukrainën, përshkroi një peizazh shkatërrimi të plotë, breshërie të vazhdueshme artilerie dhe “granatime kaotike”.
Ai thotë se civilët e mbetur po struken në bodrume dhe dalin nga strehimet vetëm për të marrë ushqim.
“Ka ende njerëz në qytet, disa prej tyre janë shumë të moshuar, ka edhe trupa të pajetë të civilëve, ne po përpiqemi t’i marrim trupat, por nuk ka asnjë mënyrë për të arritur tek ata”, ka deklaruar ai.
Më e rëndësishmja, Khalid Makhiazo thotë se forcat ruse nuk e kanë marrë qendrën e Bakhmutit dhe ishin ende në periferi, pavarësisht pretendimeve të tyre.
Por ai pranoi se gjërat mund të ndryshojnë në terren tepër shpejt.
“Ata janë në periferi dhe qyteti është nën kontrollin tonë. Unë mendoj se luftimet do të vazhdojnë… do të ketë një luftë dhe ne nuk do të heqim dorë nga qyteti ashtu”, deklaroi ai.
