Kreu i grupit parlamentar në Partinë Demokratike, Gazment Bardhi, ka mbetur i lënduar gjatë trazirave që ndodhën pasditen e djeshme në sallën e Kuvendit. Mësohet se Bardhi ka lënduar këmbën, gjatë momentit të rrëzimit të foltores, dhe për këtë i është dashur që të marrë trajtim në spital. Lajmi është bërë i ditur nga drejtori i komunikimit në Partinë Demokratike, Alfred Lela.
Alfred Lela sqaroi se Bardhi ka marrë plagë në këmbë, pasi i ka rënë foltorja dhe aktualisht ndodhet në spital për të marrë ndihmën mjekësore.
Alfred Lela: Është lënduar në këmbë, i ka rënë foltorja kur e kanë tërhequr për ta rrëzuar. I ka dëmtuar këmbën dhe po merr ndihmën dhe nuk ishte në gjendje të mundshme. I urojmë shërim të shpejte.
Gjatë seancës së ditës së djeshme, Bardhi qëlloi me këmbën e karriges në drejtim të kryetares së Kuvendit Elisa Spiropali. Për aktet e dhunës, si dhe për djegien e karrigeve në ambientet e jashtme të Kuvendit, mazhoranca ka kërkuar përjashtimin e 24 deputetëve të opozitës nga seancat e ardhshme plenare, përfshirë dhe vetë Bardhin.
