Ka një seksion nëpër profilet në rrjete të ndryshme sociale, si Facebook apo Instagram, posaçërisht për fotot ku të kanë etiketuar të tjerët. Janë ato foto që ti zakonisht s’e ke dhënë miratimin që të publikohen kund, ose edhe nëse e ke dhënë për t’i bërë qejfin shokut se ka dalë mirë, sigurohesh që të mos e shikojnë miqtë e tu.
Kurse VIP-at, na e merr mendja se janë mësuar duke e parë veten në lloj-lloj pozash, edhe nga ana jo e mirë e fytyrës. Albumi i fotove ku i kanë etiketuar përmban me dhjetëra mijëra foto, shumë më shumë se ç’mund të kenë postuar vetë gjatë gjithë jetës. Me gjasë, shumë foto as që e dinë se i kanë.
Vëmë dorën në zjarr që Nicole Scherzinger as që ia ka idenë e kësaj fotos me djalin shqiptar. Ai e rastisi në aeroport dhe u shkrep ky kujtim i bukur mes atyre të dyve, jo se po themi se mund të ketë diçka mes tyre se është absurde të aludosh se mund të ketë diçka kur kjo është thjesht një foto me fansin, paçka se kështu nisin dashuritë e mëdha, as se Nicole Scherzinger ka nja dy histori me nja dy shqiptarë dhe ne mendojmë se i ka qejf djemtë tanë, gjithsesi ju shikojeni foton vetë:
Me siguri as ikona e milanistëve Andriy Shevchenko s’e di ekzistencën e kësaj fotoje. Shevi, mos na hidh në gjyq. Ti ishe dakord të shkrepej. Mund të ishe fokusuar tek kamera dhe të jepje një buzëqeshje të vockël sa për fotozheni. Ja, djali jonë sa bukur pozon: si model!
E shikon Xhensila Myrtezajn? Sa i del kamera përpara, tak!, buzëqesh dhe del bukur në foto. Po pse, ne do t’ju mësojmë?
Apo Lulëzim Basha! Buzëqeshja e tij është ikonike, gati-gati emojike. Ai e di që mbështetësit e tij e adhurojnë këtë buzëqeshje, ndaj buzëqesh. Djali që na dërgoi foton e mbuloi fytyrën me një ikonë, kurse kryetari i PD-së është një ikonë më vete.
“I madhi Frank Lampard”, shkruan bashkëshortja e burrit që ka dalë në foto me futbollistin e famshëm britanik, që tani shkruan libra për fëmijë. Është e trishtë që s’e shikojmë dot fytyrën e tij; tifozët shqiptarë të Chelsea-t i kemi si ujët e paktë.
Zaimina. Ah, Zaimina. E përqafon fansin e saj si ta kishte shok prej vitesh, jep një nënqeshje dhe le ta çojnë foton nga të duan!
Lorik Cana është përfundimisht më mirë me look-un e ri me flokë të shkurtra, por atë që e ka, e ka. Domethënë, ngjan shumë djalë i mirë dhe pozitiv. Se është dhe i martuar.
Ua Salsano! Salsano është bërë baba për herë të dytë! Urime! Të gjithë një pije nga unë!
Ky është shoku ynë Zhaku i Big Brother 7, që na çoi këtë foton me këngëtarin e famshëm italian Nek. S’e kishim parë ndonjëherë me këtë sy Nek-un, po që qenka alamet kingu?
Një fans me emrin Edi na dërgoi këtë foto ku ka dalë me mua, kur isha bjonde dhe cool, pra mbaja flokë të shkurtër. Tani që jam bërë VIP kam ndryshuar look, prandaj edhe s’më njeh njeri. Gjithsesi më solli fat. Thanx Edi!
