“Shqiptarët nuk kanë kohë për të humbur, 30 qershori, data e zgjedhjeve vendore është moment i rëndësishëm për të vlerësuar drejtimin në të cilin duhet të ecim, drejt Bashkimit Europian.”
Kështu u përgjigj nga studio e ERTV-së, Sekretari i Përgjithshëm i Partisë Socialiste, Taulant Balla, kur u pyet se çfarë qëndrimi do të mbante forca e tij në rast se opozita nuk hynte në zgjedhje.
Sipas Ballës, kjo sjellje e opozitës, duke filluar që me djegien e mandateve, ka vetëm dy qëllime, të bllokojë refomën në drejtësi dhe çeljen e negociatave për anëtarësim me Bashkimin Europian.
“Ata kanë 2 qëllime, të bëjnë çka munden për të penguar reformën, dorëzimi i mandateve ishte përpjekje për të penguar implementimin e një reforme historike. E dyta, përpjekja për të penguar hapjen e negociatave në Qershor. Për të nxirë imazhin e Shqipërisë përballë vendeve të Be. Nuk ka asnjë shqiptar sot që nuk e beson se Luli dhe Monika, me hapjen e negociatave do merrnin një shuplakë tjetër dhe kjo është përpjekja e tyre e fundit për të penguar procesin historik drejt BE. Kryeministri ka qënë gjithmonë i gatshëm për dialog me opozitën por pa shkelur mbi kurrizin e kushtetutës dhe të demokracisë”, tha Balla.
Sipas Ballës, edhe bashkitë që janë nën qeverisjen e PD, në vend që të punojnë me projekte ambicioze shfrytëzohen për të mbushur sheshet e protestave të opozitës.
“Në Përrenjas qeveris LSI dhe aty ka patur gjithmonë një mungesë bashkëpunimi edhe pse fondet e qeverisë Rama aty kanë qënë më të mëdha se sa për Librazhdin, nuk ka pasur diferencim në fonde. Por projektet e tyre kanë lënë për të dëshiruar”, tha Balla.
Kreu i grupit parlamentar socialist shtoi se Komisioni Europian konfirmoi bindjen që Shqipëria ka bërë progress në forcimin e shtetit ligjor dhe konsolidimin e administratës publike.
