Ditën e sotme dy vëllezër u “përleshën” në Tiranë me thika për motive pronësie. Njëri prej tyre u arrestua e tjetri përfundoi në spital.
Fatkeqësisht, ngjarje të këtij lloji, ku brenda familjes ndodhi të tilla konflikte nuk janë të pakta. Me një kërkim fare të thjeshtë zbulohen disa ngjarje ku vëllai ka plagosur të vëllanë, madje dhe nipin e tij e shkaku fare banal ka qënë mbi një pronë, apo thjeshte fare mbi një gardh.
Çfarë ndodhi sot:
Një konflikt mes dy vëllezërve në Tiranë ka degjeneruar në plagosjen me thikë të njërit prej tyre. Ngjarja ka ndodhur mesditën e sotme dhe i plagosuri Ilirjan Xixa raportohet se ndodhet jashtë rrezikut për jetën.
“Në rrugën ‘Meme Meto’ janë konfliktuar për motive të dobëta dy vëllezër (shtetasit I. X., dhe A. X.,) ku gjatë konfliktit shtetasi I.X., ka qëlluar në trup me mjet prerës, vëllain e tij, shtetasin A. X. I dëmtuari A. X., është transportuar në spital për ndihmë mjekësore dhe ndodhet jashtë rrezikut për jetën. Shërbimet e Policisë kanë kapur dhe shoqëruar në Komisariatin e Policisë Nr.4, për veprime të mëtejshme autorin I.X., si dhe kanë sekuestruar në cilësinë e provës materiale mjetin prerës”, njoftoi zyrtarisht Policia.
Dyshimet janë se sherri mes vëllezërve Ilirjan dhe Artan Xixa, 43 vjeç, ka lindur për një mosmarrëveshje pronash.
Vau Dejës, 64 vjeçari plagos të vëllanë
Një 64-vjeçar ka mbetur i plagosur nga vëllai i tij, në fshatin Kosmaç të Vaut të Dejës.
A. Zallina, 64 vjeç ësht plagosur me armë zjarri nga vëllai i tij, Dini, 52 vjeç, i cili u arrestua menjëherë nga policia. Atij iu sekuestrua edhe arma e dyshuar.
Shkak i konfliktit mes vëllezërve kanë qënë problemet e pronësisë.
Memaliaj, 55 vjeçari godet vëllain tre vite më të madh
Sherri për pronat mes dy vëllezërve ka çuar në plagosjen e njërit prej tyre. Ngjarja ndodhi në Memaliaj. Policia ka arrestuar në flagrancë 55-vjeçarin, Robert Beta, banues në fshatin Vasjar. Në banesën e tyre, për motive pronësie, 55 vjeçari ka goditur me sende të forta vëllanë e tij I.B, 58 vjeç.
Ky i fundit ka marrë dëmtime të rënda në kokë dhe në trup.
Bulqizë, 43 vjeçari plagos të vëllanë dhe nipin
Dy vëllezër dhe djali i njërit prej tyre janë përfshirë në një sherr brenda familjes në Ostern të Madh të Bulqizës.
43-vjeçari Hiqmet Tola është përleshur me vëllanë e tij, shtetasin me inicialet F.T., 52 vjeç dhe djalin 25-vjeçar të këtij të fundit.
Në konflikt e sipër, Hiqmeti ka marrë një mjet prerës dhe ka goditur ndaj të vëllait dhe nipit të tij.
Sherri ka ndodhur për një gardh që dikur ishte i vendosur si kufi ndarës mes dy vëllezërve.
Njëri prej vëllezërve dyshohet se e ka lëvizur gurin dhe e ka postuar nga krahu i pronës së vëllait tjetër.
Në konflikt janë përfshirë 7 pjestarë të dy familjeve.
Përgatiti: AlpeNews.al
