Në një ceremoni shtetërore të organizuar në Xhenova, me qindra qytetarë dhe zyrtarë i kanë dhënë lamtumirën e fundit 19 viktimave të tragjedisë nga shembja e urës “Morandi” më 14 gusht, ndërsa e shtuna ishte dhe ditë zie kombëtare.
Pjesë e ceremonisë ishte dhe Presidenti, Sergio Mattarella, i cili tha se kjo është një “tragjedi e papranueshme”.
Në nderimin e fundit për viktimat, të pranishmit nuk i kursyen duartrokitjet e gjata për zjarrfikësit, por dhe për qeverinë. Mes 19 viktimave që u përcollën për në banesën e fundit ishte dhe një prej viktimave shqiptare, Marjus Djerri, 22 vjeç.
Familja e të riut jeton prej vitesh në shtetin fqinj dhe zgjodhën që varrimi i tij të kryhej në Itali. Ndërsa viktimës tjetër, Admir Bokrina, 30 vjeç, do t’i kryhen nderimet e fundit në Shkodër.
Dy të rinjtë ishin duke shkuar për në punë dhe po udhëtonin në të njëjtin automjet në momentin e shembjes së urës. Gjatë ceremonisë shtetërore, përveç lutjes së klerikëve të krishterë, nuk mungoi edhe ajo e klerikëve të besimit mysliman për të respektuar besimin fetar të 22- vjeçarit Djerri.
Edhe pse kanë kaluar pesë ditë nga ngjarja, kërkimet ende vazhdojnë, ndërsa deri tani numri i viktimave ka shkuar në 43.
Ndërkohë që hetimet për tragjedinë pritet që ta konsiderojnë ngjarjen për faj të një gabimi njerëzor, gjë e cila do të rëndojë mbi kompaninë e mirëmbajtjes së saj, vetëm kompania “Autostradë për Italinë”, ka dhënë një fond për familjet e viktimave.
