Numri i viktimave nga përmbytjet në Teksas të SHBA është rritur në 67, përfshirë 21 fëmijë, raporton BBC. Shirat e rrëmbyeshëm shkaktuan përmbytje të menjëhershme ndërsa lumi Guadalupe doli nga shtrati. Zona më e prekur është qarku Kerr, ku kanë vdekur 43 persona dhe 11 fëmijë rezultojnë ende të zhdukur.
Fëmijët ishin në një kamp të krishterë të vendosur përgjatë lumit Guadalupe. Njerëz janë konfirmuar të vdekur edhe në pjesë të tjera të shtetit amerikan, duke përfshirë Qarkun Travis dhe Qarkun Tom Green. Paralajmërime të shumta për përmbytje mbeten në fuqi ndërkohë që deri më tani janë shpëtuar rreth 850 persona.
Në një konferencë për shtyp pasditen e së shtunës, Guvernatori i Teksasit, Greg Abbott, u shpreh se kishte nënshkruar një deklaratë të zgjaste gjendjen e fatkeqësisë natyrore. Presidenti Donald Trump deklaroi se administrata po punon ngushtë me autoritetet lokale për t’iu përgjigjur emergjencës, ndërkohë që Sekretarja e Sigurisë Kombëtare, Kristi Noem, tha se qeveria federale do të dërgonte Rojen Bregdetare për të ndihmuar në kërkimet e personave të zhdukur.Parashikuesit e motit kanë paralajmëruar se Teksasi qendror mund të përballet me më shumë përmbytje këtë fundjavë.
Pjesa më e madhe e operacioneve të shpëtimit është përqendruar në një kamp veror të madh të krishterë vetëm për vajza të quajtur Camp Mystic, i vendosur përgjatë brigjeve të lumit Guadalupe. Zëvendësguvernatori i Teksasit, Dan Patrick, i tha programit Radio 4 PM të BBC-së se shumë nga 27 vajzat e zhdukura ishin nën moshën 12 vjeç.
Shumë prej tyre ishin në gjumë kur niveli i lumit u rrit më shumë se 8 metra në më pak se një orë në orët e para të së premtes. Më shumë detaje rreth atyre që vdiqën kanë filluar të dalin në dritë – disa ishin vetëm tetë vjeç.
Zëvendësguvernatori i Teksasit, Dan Patrick, shpjegoi se “brenda 45 minutash, lumi Guadalupe u rrit 8 metra dhe pati një përmbytje shkatërruese, e cila mori prona dhe për fat të keq edhe jetë njerëzore”.
Dhjetëra kampistë që po kalonin pushimet gjatë fundjavës së 4 korrikut rezultojnë gjithashtu të zhdukur.
