Presidenti i ShBA-së, Donald Trump, ka emëruar Richard Grenell, si drejtor ekzekutiv të përkohshëm të Qendrës ‘John F. Kennedy’ për Artet Performuese në Uashington.
Ky vendim erdhi pasi Trump e caktoi veten kryeshef të kësaj qendre kulturore.
“Jam i kënaqur të njoftoj se Ric Grenell do të shërbejë si Drejtori Ekzekutiv i Përkohshëm i Qendrës Kennedy. Ric ndan vizionin tim për një EPOKË TË ARTË të Arteve dhe Kulturës Amerikane dhe do të mbikëqyrë operacionet e përditshme të Qendrës. Asnjë shfaqje drag ose propagandë tjetër anti-amerikane – vetëm më e mira. Ric, mirë se vjen në botën e shoubiznesit”, shkroi Trump në Truth Social.
Te premten Trump ka njoftuar për shkarkimin e bordit të qendrës “Kennedy”.
Qendra Kennedy, e cila merr fonde federale, është një nga vendet kryesore të artit në vend dhe ka gëzuar prej kohësh mbështetjen dypartiake, raporton Guardian.
Programi i tij përfshin koncerte të muzikës klasike, shfaqje kërcimi si Alvin Ailey dhe The Nutcracker, shfaqje magjike, opera dhe shfaqje të shumta që synojnë veçanërisht fëmijët.
Lista e saj e muzikaleve gjatë dy viteve të fundit ka përfshirë Frozen, Funny Girl, Les Misérables, The Lion King, Mamma Mia!, Moulin Rouge, Spamalot, Sunset Boulevard dhe Ëicked.
Gjatë mandatit të tij të parë në detyrë, Trump shpërfilli nderimet vjetore të Qendrës Kennedy, që konsiderohet si çmimi më i lartë kombëtar për arritjet në art. Joe Biden u nderua në secilin prej katër viteve të presidencës së tij.
Në dhjetor të 2024-ës, në shfaqjen e fundit ku mori pjesë Biden, drejtuesit e qendrës e bënë të qartë se Trump është i mirëpritur të vijë në të ardhmen.
Qendra Kennedy konsiderohet një memorial i gjallë për ish-presidentin John F Kennedy dhe muri i saj i jashtëm është i gdhendur me citime nga presidenti i 35-të. Njëri thotë: “Unë pres me padurim një Amerikë që do të shpërblejë arritjet në art, ashtu siç ne shpërblejmë arritjet në biznes apo shtet.
“Unë pres me padurim një Amerikë që do të rrisë në mënyrë të qëndrueshme standardet e arritjeve artistike dhe që do të zgjerojë vazhdimisht mundësitë kulturore për të gjithë qytetarët tanë. Dhe unë pres me padurim një Amerikë që kërkon respekt në të gjithë botën jo vetëm për forcën e saj, por edhe për qytetërimin e saj.”
