Në Gjirokastër, apo siç njihet ndryshe, “Qyteti i një mijë e një dritareve”, janë restauruar disa shtëpi karakteristike përgjatë viteve të fundit, duke shtuar kështu numrin e banesave të restauruara dhe të kthyera në bujtina.
Kjo godinë që ende po restaurohet deri pak muaj më parë ishte në gjendje të rrënuar ashtu si simotrat e saj në të gjithë Gjirokastrën.
Sot ajo ka marrë trajtën e një godine të re që ka ruajtur tiparet më të mira të shtëpive karakteristike gjirokastrite me bazë gurin dhe drurin.
Wooter është vetëm një prej shtetasve të huaj që kanë zgjedhur Gjirokastrën për të jetuar dhe punuar. Prej katër vitesh ai ka shndërruar shtëpinë e dikurshme të Dobajve në një hostel, ku mirëpret turistë nga vende të ndryshme të botës.
Ai tregon se gjatë restaurimit të banesës është përpjekur të ruajë elementet tradicionale të saj, ndërsa nuk mungojnë detajet e shtëpisë së dikurshme.
“Jam nga gjermania dhe kam ardhur në 2009 në Shqipëri. E pëlqeva shumë, mbeta i surprizuar prej saj, dhe vendosa se Gjirokastra do të ishte vendi ideal për të ndërtuar një hostel. Në 2014 vendosa përfundimisht të qëndroja këtu. Bleva këtë shtëpi të vjetër gjirokastrite të cilën e restaurova dhe ja ku jemi sot. Gjithçka po ecën mirë, vera është vërtet shumë e ngarkuar. Të blije një shtëpi ishte gjëja më e thjeshtë. Restaurimi ka qenë procesi më i vështirë. Nga njëra anë ishte shteti dhe procedurat burokratike që vështirësonin, nga ana tjetër ishte gjetja e njerëzve të duhur për të realizuar atë që kisha në mendje, por në fund ia arrita”, thotë Wooter De Rooij.
Restaurimi i banesave karakteristike po ngjall shpresën e ruajtjes së vlerave kryesore të trashëgimisë kulturore dhe arkitektonike në qytetin e gurtë.