Punimet për ndërtimin e seksionit detar të Gazsjellësit Trans Adriatik (TAP) do të nisin sot në Seman të Fierit.
Kjo fazë do të inaugurohet me një ceremoni me pjesëmarrjen e Kryeministrit Edi Rama, Ministrit të Infrastrukturës dhe Energjisë, Damian Gjiknuri, kryetarit të Bashkisë së Fierit, Armando Subashi, si edhe me drejtues të “TAP”.
Seksioni detar i Gazsjellësit Trans Adriatik do të lidhë segmentin shqiptar (105 km) me atë italian.
Tubat do të shtrihen në shtratin e Adriatikut, ku pika më e thellë e tubacionit do të jetë më shumë se 810 metra nën sipërfaqen e detit.
Për shtrirjen në ujëra të thella të 9 mijë tubave me peshë të përafërt 100 mijë ton do të përdoret një anije shtrimi gjysmë e zhytur në ujë.
Me ndërtimin e seksionit detar do të merren 10 anije; dy anije do përdoren për shtrimin e tubacionit dhe 8 të tjerat do të përdoren për drenazhimin, furnizimin me tuba dhe punimet e tjera.
