Kur thua Samsung, ke thënë më shumë se “kompania koreane e elektronikës”. Gjiganti i prodhimit të pajisjeve që kanë ndryshuar stilin e jetesës të qindra miliona njerëzve në mbarë botën është një makineri fitimprurëse.
Nga korriku deri në shtator Samsung ka raportuar fitime prej 10 miliardë dollarësh, që është një rekord. Ndryshe nga minikriza e vitit të kaluar, kur u raportuan shumë raste me Note 7 që digjeshin, vera e 2017-s ka rezultuar një sukses i vërtetë.
Për ta shpjeguar edhe më mirë, fitimet e Samsung-ut gjatë këtyre tre muajve janë rritur me 148% krahasuar me një vit më parë. Pra, mesatarisht 109 milionë dollarë në ditë. Arsyeja kryesore është prodhimi i Note 8-s.
Para dy javësh, të gjithë u shtangën nga lajmi i largimit të menaxherit të përgjithshëm të kompanisë, Kwon Oh-Hyun, por duket se ky ka qenë hapi i duhur. Kompania parashikon rritje të fitimeve nga biznesi i semikonduktorëve, kështu që priten të tjera lajme “bombë”.
