Tri vëllezër nga Vlora janë arrestuar nga policia pasi akuzohen për “kundërshtim dhe goditje të gjyqtarit”, kryer në bashkëpunim.
Mësohet se tre vëllezërit Myslimi kanë kundërshtuar me dhunë gjyqtarin Arqile Basho në ambientet e brendshme të gjykatës.
Dje në disa media u publikua edhe një video denoncuese ku personat në fjalë shfaqeshin duke u konfrontuar e duke debatuar me gjykatësin.
Prej tetë vitesh familja Myslimi po përplaset nëpër dyert gjykatave të Vlorës për një pronë e cila nga shtëpi banimi është bërë pallat.
“Ti e ke dhënë për herë të dytë këtë, ky gjykatës jep vendime të gabuara. Ky është ai Arqileja, mos ik e shit gjyqin. Sa lek ke marrë, o qen bir qeni”, ka thënë një prej familjarëve në gjyq.
Pas mbarimit të gjyqit, vëllezërit e ndjekin nga pas, ndërsa njëri prej tyre e vendos pas një muri gjyqtarin duke i hequr pelerinën.
Gjatë gjithë kohës, gjyqtari dëgjohet vetëm duke thënë: Qetësohuni! Ruani qetësinë!
Njoftimi i plotë i policisë
Specialistët për Hetimin e Krimit në Komisariatin e Policisë Vlorë arrestuan në flagrancë për veprën penale “Kundërshtimi dhe goditja e gjyqtarit”, kryer në bashkëpunim, shtetasit M. M., 60 vjeç, F. M., 62 vjeç dhe E. M., 64 vjeç (vëllezër), të tre banues në Vlorë, pasi në bashkëpunim me njëri tjetrin, në ambientet e brendshme të Gjykatës, kanë kundërshtuar me dhunë, shtetasin A. B., 63 vjeç, banues në Gjirokastër, me detyrë gjyqtar në Gjykatën e Shkallës së Parë Vlorë.
