Rudina Hajdari ishte e ftuara e Bieta Sulos në studion e Ftesë në Pesë në Top Channel, për të folur mbi ngjarjet më të fundit në politikë, si dhe për të na njohur më shumë me jetën personale.
Gjatë bisedës në studio ajo shprehu dëshirën të sqaronte edhe një çështje që sipas saj ka ngjallur shumë kureshtje dhe dyshime nga të gjithë, jetesën dhe shkollimin në Shtetet e Bashkuara të Amerikës, aty ku u zhvendos pak vite pas vdekjes së të atit.
Rudina tregoi se ka punuar që në moshën 16 vjeçare dhe ka vazhduar të punojë edhe gjatë studimeve të mëvonshme në punë të thjeshta si shitëse apo pozicione të ngjashme.
Sa i përket shkollimit, ajo pranoi se në Amerikë është shumë i kushtueshëm, por fatmirësisht ka patur gjithnjë mbështetje financiare nga shteti për shkak të rezultateve të shkëlqyera gjatë studimeve.
Kohët e fundit ajo ka qenë fokusi i mediave, lidhur me fjalimet e guximshme në Parlament apo deklaratat për dorëzimin e mandatit të deputetes në shenjë solidarizimi me protestën studentore.
Rudina pranoi se sistemi arsimor ka nevojë për ndryshime të mëdha, duke bërë një krahasim të situatës me lëvizjen studentore te viteve ’90, kryesuar nga babai i saj Azem Hajdari.
Ajo e shprehu hapur dëshirën për të ndjekur gjurmët e tij, duke u ndjerë shumë krenare për të shkuarën e të atit dhe familjes së saj.
