Në një kohë kur qytetarët janë ngritur në protestë kundër rritjes së çmimeve, deputetja e Partisë Socialiste Luljeta Bozo u kërkon atyre që të solidarizohen me krizën ekonomike se sytë në ballë i kanë për të kuptuar situatën e jashtëzakonshme. “Duhet të sensibilizohen njerëzit, se sytë në ballë i kanë… ata shkojnë përditë që blejnë dhe menjëherë sinjalizojnë, të vijnë grupet, të kontrollojnë dhe të marrin masa. Kjo është situatë e jashtëzakonshme”, u shpreh ajo.luljeta bozo1
Sa i përket shtesës prej 3.000 lekësh të pensionit, Bozo thotë se ajo është llogaritur si subvencion për përballimin e rritjes së çmimeve për produktet e shportës. Sipas saj, tani që për pagat nën 40.000 lekë janë hequr tatimet, në vitet në vijim do të rriten sigurimet dhe për pasojë dhe pensionet.
“3.000 është shtesa që merr një pensionist që merr sa gjysma e rrogës minimale, (32000 lekë nga 1 prilli). Është llogaritur sa është rritur inflacioni, aq do të kompensohen të gjitha pensionet. Do të indeksohen, dhe kjo është ndihmë. Duhet të jemi shumë objektiv që të gjithë që të sinjalizojmë atje ku duhet kur shikojmë që nuk ecën një gjë. Duhet të dini që pensionet nuk dalin nga puna që kanë bërë njerëzit. Njerëzit që kanë punuar para 30-40 vitesh kanë paguar sigurime, janë prishur raportet. Tani do të fillojë pak nga pak, vit pas viti, meqë u hoqën tatimet për rrogën nën 40.000 lekë, do të kenë mundësi të grumbullohen më shumë sigurime, më shumë para dhe gradualisht do të ngrihet dhe pensioni se s’ka si të rritet ndryshe”, tha ajo për Top Channel.
Bozo tha gjithashtu se shërbimet për qeveritarët janë reduktuar, megjithatë shërbime të tilla luksi si përdorimi i makinës me shoferë personalë në një kohë krize, duhen mos pasur në konsideratë.
“Janë ulur në maksimumin e mundshëm. Shpenzimet për shërbimet ndaj qeveritarëve janë ulur në minimumin e mundshëm. Këto gjëra nuk zënë kaq shumë peshë, edhe pse nuk e diskutoj që duhen pasur në konsideratë”, theksoi ajo.
Në fund, deputetja më e vjetër aktualisht në parlamentin shqiptar iu përgjigj nëse është penduar “që ka kandiduar për pozicionin e deputetes”: Hë për hë jo njëherë, është një punë e një natyre krejt tjetër. Unë mendoj që atë që kam duhet ta jap dhe mundohem ta jap në maksimum. Por të ngrihem dhe të flas, nuk e kam në natyrë”.
