Kryetari i Bashkisë së Tiranës, Erion Veliaj u shpreh se vitin tjetër do të mbyllet procesi i rindërtimit. Duke folur në Report tv, Veliaj nënvizoi se ata që kanë firmosur të parët kontraten, janë futur tashme në banesat e reja.
“Teksa mbarojmë pallatet e fundit edhe në Kombinat, edhe në breg të lumit te “5 Maji”, do jetë bashkia që do vazhdojë ta paguajë qiranë, derisa të merret çelësi të futesh te shtëpia e re. Ki parasysh, kush firmosi i pari dhe u tregua bashkëpunues, u fut ne shtëpi. Kush priti deri në fund me shpresë që partia i thoshte do ta bëjmë ne, ajo parti dogji shtëpinë e vet në 8 janar. Pra një parti që djeg shtëpinë e vet, do bëjë shtëpi për njerëzit? Kështu që tani shumica ka rënë dakord dhe ne i kemi fituar të gjitha gjyqet, edhe të partisë së lekut, ndërkohë edhe për partinë e sherrit, dajakut, ne kemi filluar kantieret dhe po të shkosh sot te “5 Maji”, gjysma e pallateve janë të banuara”, theksoi Veliaj.
Kryebashkiaku Veliaj deklaroi se hienat tentuan të bllokojnë ‘Kombinatin’ dhe ‘5 majin’. “Ne kemi mbaruar me të gjithë hapësirat rurale. Kështu që me fshatin e fundit në Zall – Herr, me lagjen e re në Ndroq. Jemi me lagjen e parë që u hap në Vaqarr, po përfundon Peza. Kështu që le të themi që tek pjesa e fshatit kemi ecur shumë – shumë mirë dhe pjesa tjetër që s’është në këto lagjet e reja, kanë bërë rindërtimin në vend. Kemi pasur 2 problematika, Kombinatin dhe “5 majin”, që ju i keni ndjekur prej 3 vitesh. Strategjia e hienave të politikës ishte, LSI-ja tani ka ndërruar emrin, se një qepen është, por mbyll qepen, ndërro nipt-in, kjo partia e re tani e lekut, kishte Kombinatin, kurse PD-ja do mbulonte dhe do markonte “5 majin” me 2 strategji të ndryshme. Monika me të vetët do hapte gjyqe pa fund që ta bllokonte nga ana ligjore, kurse ajo partia që është edhe më e rrugës dhe më e dhunës, ata do bllokonin thjesht fizikisht aty dhe do nxirrnin disa personazhe që edhe pse do merrnin 500 m2, prapë thoshin që nuk është gjë e drejtë, ndërkohë që kishin ndërtuar pa leje në shtrat të lumit. Kështu që në këtë sens në një vend u desh ta bënim betejën ligjore, në një vend tjetër me të gjithë ato personazhe të OFL-së që megjithëse kishin 22 makina Range Rover, nuk kishin qira për nënën”, tha Veliaj.
