Presidenti Ilir Meta ka reaguar në mënyrë të ashpër ndaj ambasadores amerikane Yuri Kim, që e ftonte të mos përdorte më terma që ngrenë tensionin para zgjedhjeve.
Sipas Lutfi Dervishit, i ftuar në Absolut 4, “Shtetet e Bashkuara të Amerikës nuk kanë asnjë interes përtej një procesi të rregullt ku zëri dhe vota e njerëzve të dëgjohet dhe numërohet. Roli i marrë nga ambasada amerikane tregon dobësinë e institucioneve tona.
Përplasja me Ambasadën e SHBA nuk është e ere në 30 vjet, por qëndrimi ka qenë konstant, një vend që e futi Shqipërinë me zor në NATO dhe tani po e shtyn drejt BE-së”.
Sipas tij “në kodin e komunikimit, edhe armikut nuk i thuhen disa gjera, jo më dikujt që e ke aleat.
Ndërkohë Gjergji Vurmo deklaroi se “deri në ngjarjet e ditës së pardjeshme, zgjedhjet kishin arritur standardin e vitit 2005, por kjo replikë midis Metës dhe ambasadores rrezikon ta çojë atë në vitet ’90 , ku SHBA u shpall si një armik i jashtëm”.
Vurmo shtoi se ngjarja rrezikon të marrë përmasat e një incidenti diplomatik, dhe se “nuk do të ishte keq që Meta pas zgjedhjeve duhet të jepte dorëheqjen, madje po të vazhdojnë replikat do të ishte mirë që ta jepte përpara tyre”, ndërkohë që kryeministri Rama sipas tij mund të shfrytëzojë këtë përplasje.
Për Afrim Krasniqin, gjithsesi, diferenca e viteve 90 është e madhe, nga momenti që edhe ndikimi i Metës është më i kufizuar se i atyre të partive kryesore. Por analisti sheh edhe një kalkulim të presidentit që edhe pse ka bërë një deklaratë “të papranueshme, por për militantët mund të jetë ushqim, dhe për ato ka nevojë në këto ore. Ai i tregon që nuk pyet për njeri”.
