Ekzekutohen në Ekuador një shqiptaro-malazez dhe bashkëshortja e tij ekuadoriane. Mediat vendase shkruajnë se 64-vjeçari Fadil Kaçaniç dhe bashkëshortja e tij 63-vjeçare ekuadoriane u gjetën të vrarë në një zonë të banuar pranë qytetit të Guajakilit, në perëndim të vendit.
Dyshohet se shqiptaro-malazezi ishte i përfshirë në trafikun e kokainës. Shtypi ekuadorian shkruan se Kaçaniç ishte qëlluar për vdekje me tre plumba, ndërsa bashkëshortja ishte goditur me sende të forta. Krimi ka ndodhur të mërkurën.
Trupat e tyre u gjetën pranë një autostrade jo shumë larg vendit ku banonin. Hetuesit thanë se bëhet fjalë për disa pjesëmarrës në krim, të cilët hynë në shtëpinë e tyre të veshur si policë. Pasi i vranë, ata u kishin marrë edhe një shumë të madhe parash që dyshohet se Kaçaniç i kishte përfituar nga trafiku i drogës. Ekzekutorët lëviznin me dy automjete me xhama të errët.
Hetime po kryhen për lidhjet mes këtij rasti me ngjarjeve e dy viteve të kaluara. Rasti i parë është ai i Majit të 2016-ës kur shqiptari Ilir Hidri u qëllua për vdekje në Guajakil.
Ai u vra me 3 plumba pas koke, siç edhe u mësua më vonë nga një tjetër shqiptar. Ilir Hidri dyshohet se është vrarë pasi prej disa kohësh ai ishte inflitruar në një rrjet të trafikut të kokainës nga Amerika Latine në Europë e Shqipëri.
Ndërsa i dyti, plagosja e kosovarit Remzi Azemit, të dy të dyshuar si trafikantë kokaine.
Ngjarja: Azemi lëvizte me një automjet të blinduar, kur iu afruan dy persona që lëviznin me motoçikletë. Ata qëlluan në drejtim të tij 4 herë. Azemi ndodhej në shoqërinë e bashkëshortes së tij me origjinë shqiptare, si dhe vajzës 3 – vjeçare.
Azemi kishte ndaluar automjetin, teksa bashkëshortja e tij po tymoste një cigare. Ajo kishte hapur përgjysmë xhamin e automjetit dhe pikërisht kjo hapësirë është shfrytëzuar nga atentatorët për të qëlluar në drejtim të tij.
Lidhja: Azemi kishte patur lidhje edhe me shqiptarin Ilir Hidri, 39 – vjeçarin e vrarë më 30 Maj po në Guayaquil, ngjarje që dyshohet se ka lidhje gjithashtu me pazaret e drogës. Shefi i Antikrimit asokohe tha gjithashtu se Azemi jetonte në një shtëpi me qera në pronësi të Hidrit.
AlpeNews.al
