Ditët e fundit numri i të infektuarve dhe viktimave nga COVID-19 në vendin tonë është rritur ndjeshëm.
Në spitalin Infektiv çdo ditë vijojnë të shtrohen persona të infektuar, ndërsa mjekët vazhdojnë të bëjnë thirrje për të respektuar rregullat, në mënyrë që të parandalohet përhapja e virusit.
Mjekja e QSUT, Mira Kola u ka bërë aepl qytetarëve që të mos hezitojnë të mbajnë maskë dhe të ruajnë distancimin social, pasi në dukje këto janë gjëra të vogla, por që shprehin mirënjohje dhe përkushtim për të gjithë stafin që punojnë me pacientët me koronavirus.
“Ju ftoj të gjithëve së bashku të çelim ndjenjën e përgjegjësisë, ndjenjë që lidhet me zbatimin e masave ndaj këtij virusi që u bë ditë dhe muaj midis nesh. Nuk ju kushton asgjë të mbani një maskë, nuk ju kushton asgjë të ruani distancimin fizik. Masa këto që në pamje të parë duken të thjeshta, por që shprehin një dashuri pa kufi për jetën, shprehin mirënjohje dhe përkushtim për gjithë stafin që punojnë me pacientët me COVID”, shkruan mjekja.
