Universiteti i Tiranës vijon të shfaqë problematika të shumta dhe performancë të ulët akademike. Në bazë të një raporti të hollësishëm të përpiluar nga Ministria e Arsimit, Sportit dhe Rinisë, konstatohen probleme në administrimin e brendshëm, kryesisht nëpërmjet bllokimit të procedurës së protokollimit, delegimit dhe vulosjes së praktikave shkresore.
Rrjedhimisht, kjo ka sjellë konfuzion në ushtrimin e funksioneve nga të gjitha organet dhe autoritetet drejtuese të UT.
“TemA” ka mundur të mësojë se nga procesverbalet e mbledhjeve të organeve kolegjiale, por dhe nga korrespondencat zytare midis autoriteve drejtuese akademike, janë konstatuar mosmarrëveshje të vazhdueshme midis palëve të cilat kanë ndikuar negativisht në rezultatin e univeristetit.
Mosmarrëveshjet janë konstatuar mes rektorit dhe drejtuesve të njësive kryesore, rektorit dhe ish kancelarit apo administratorit të komanduar dhe rektorit me administratorin e ri.
Bëhet me dije se ka patur pretendime për procedurat e punësimit të personelit akademik, mbi kompetencat ndaj personelit administrativ, mbi pezullimin nga detyra të ish Kancelarit, mbi varësinë e strukturave, midis Rektorit dhe Bordit të Administrimit apo Administratorit, në protokollimin e shkresave zyrtare të nxjerra nga autoritetet dhe organet drejtuese të UT dhe përdorimit të vulës nga organet drejtuese në Rektorat.
Ndërkohë, referuar projekt-raportit, gjithashtu konstatohet ushtrim funksionesh dhe kompetencash nga ana e organeve dhe autoritetet drejtuese të UT në kapërcim të kompetencave të dhëna nga kuadri ligjor.
Më poshtë, “TemA” po përcjell raportin e plotë të Ministrisë së Arsimit, ku në grupin e punës hulumtuese kanë qenë Alqi Kushi, Mirela Bimo, Jeton Shehu, Iva Beliu dhe Bledar Biçoku. (TemA)/a.meta
