“Do doja më shumë investime turke në Shqipëri”.
Kështu deklaroi kryeministri Rama para gazetares Ilva Tare në një intervistë në Ora News, i pyetur rreth raporteve të ngushta të qeverisjes së tij me Turqinë, dhe të atij vetë personalisht me presidentin Erdogan, i qortuar së fundi për to nga disa qarqe.
Rama tha se Turqia është partneri kryesor strategjik, e shpallur kjo që në fushatën elektorale të 2103-ës.
Nga ana tjetër, Rama i ka kthyer përgjigje profesorit të Universitetit të Columbia-s, David Philips, i cili u shpreh së fundi i ashpër për raportet e ngushta të qeverisjes Rama me Ankaranë, deri dhe prezencën në dasmën e vajzës së Erdoganit.
“Unë nuk i kërkoj leje dhe nuk i jap llogari asnjë profesori dhe asnjë tjetri se në cilat dasma shkoj, por unë nuk kërcej nëpër dasma.
Së dyti, jam ndjerë i nderuar që presidenti më ka ftuar në dasmën e të bijës.
Së treti, marrëdhëniet tona me Turqinë nuk përbëjnë në asnjë rast kërcënim të sovranitetit.
Turqia ka qenë i pari vend që ka njohur Kosovën e pavarur”, tha Rama, duke i cilësuar kritikat e Philips si broçkulla.
