Presidenti rus Vladimir Putin ndodhet në Indi, ku ka zhvilluar tashmë një takim me kryeministrin e vendit. Në një intervistë për “India Today”, ai u shpreh se gjatë nëntë muajve të parë të vitit është vërejtur një rënie e lehtë në volumin e përgjithshëm të tregtisë mes dy vendeve.
Megjithatë, Putin e cilësoi këtë si një “korrigjim të vogël”, duke theksuar se niveli i përgjithshëm i shkëmbimeve tregtare mbetet pothuajse i pandryshuar.
Sipas tij, tregtia në sektorin e produkteve të naftës, përfshirë naftën e papërpunuar dhe karburantet, po ecën normalisht në Indi. “Partnerët indianë janë të besueshëm dhe shumë seriozë. Nëse Shtetet e Bashkuara kanë të drejtë të blejnë karburantin tonë, pse të mos ketë Indija të njëjtin privilegj?”, deklaroi Putin.
I pyetur për reagimin e mundshëm të Donald Trump nëse Rusia dhe India thellojnë bashkëpunimin tregtar, Putin tha se as ai dhe as kryeministri indian Narendra Modi, pavarësisht presioneve të jashtme, nuk po ndërtojnë bashkëpunime që synojnë të dëmtojnë këdo. “Presidenti Trump ka agjendën dhe objektivat e tij, ndërsa ne jemi të fokusuar te tonat”, shtoi ai.
Putin theksoi se politika e Rusisë nuk është kundër askujt, por synon mbrojtjen e interesave të të dy vendeve. “Në marrëdhëniet tona me Indinë nuk dëmtojmë askënd, dhe besojmë se udhëheqësit e vendeve të tjera duhet ta vlerësojnë këtë”, përfundoi presidenti rus.
