Sekretari i Përgjithshëm i PD, Gazment Bardhi, ka reaguar pas postimit që Rama bëri në rrjetet sociale për mitingun e Bashës në Durrës për të cilin tha se kryedemokrati po rrezikon shëndetin dhe jetën e njerëzve për të luajtur një pllakë gramafoni.
Bardhi thotë se Edi Rama ka të drejtë të tmerrohet nga bashkimi i shqiptarëve, se sipas tij, shefi i qeverisë e përdori coronavirusin për të vjedhur qytetarët.
Më tej Bardhi thotë se pushteti kriminal, që lë shqiptarët pa asnjë qindarkë ndihmë në ditën e tyre më të keqe, është drejt fundit.
Reagimi i Gazment Bardhit
Edi Rama nuk tmerrohet nga shndërrimi i QSUT-së në vatër infeksioni për dhjetëra pacientë, mjekë dhe infermierë.
Është fakt se sot vatra e vetme e infeksionit masiv është spitali, që duhet të ishte vendi më i sigurtë e ku masat të ishin me rigoroze.
Edi Rama nuk tmerrohet nga varfëria e shqiptarëve dhe nga papunësia masive e tyre.
Edi Rama e përdori coronavirusin për të shtypur, vjedhur dhe gënjyer qytetarët. Është fakt se Edi Rama është i vetmi Kryeministër në botë që vjedh me tendera sekret e koncesione për oligarkët, dhe urdhëron prishjen e Teatrit në mes të pandemisë.
Ndaj Edi Rama ka të drejtë të tmerrohet nga bashkimi i shqiptarëve, që i la pa asnjë ndihmë, pa asnjë mbrojtje, dhe i vodhi e varfëroi edhe gjatë izolimit.
Propaganda bajate nuk e mbulon dot revoltën e qytetarëve në çdo cep të vendit. Pushteti kriminal, që lë shqiptarët pa asnjë qindarkë ndihmë në ditën e tyre më të keqe, është drejt fundit.
(TemA)