Rritja e fluksit të turistëve në vendin tonë ka sjellë interes të shtuar për ndërtimin e hoteleve dhe resorteve turistike.
Instituti i Statistikave, bën të ditur se, në tremujorin e parë të këtij viti, në të gjithë vendin, u dhanë 28 leje ndërtimi për struktura të reja akomoduese. Ndërkohë, vitin e kaluar ishin dhënë 75 leje të reja për ndërtimin e hoteleve, në rritje me 75% krahasuar me vitin 2017.
Mbështetur në të dhënat e lejeve të ndërtimit, vlera e hoteleve të miratuar për t’u ndërtuar është rreth 9.9 miliardë lekë, shifër kjo disa herë më e madhe se e gjithë vlera e lejeve të miratuara gjatë gjithë vitit 2018.
Sipas INSTAT, për vitin 2018, vendin tonë e vizituan afro gjashtë milionë shtetas të huaj, në rritje vjetore me 16%. Ky ishte njëkohësisht numri më i madh vjetor i vizitorëve të huaj i regjistruar ndonjëherë në Shqipëri.
Interesi për rritjen e investimeve reflektohet në rritjen e lejeve të miratuara për tremujorin e parë të vitit, përfshihen edhe projekte të mëdha. Ndërkohë që qeveria po aplikon incentiva fiskale për ndërtimin e hoteleve me katër dhe pesë yje, me qëllim tërheqjen e investimeve elitare në sektorin e turizmit.