Ai ka firmosur dekretin për lirimin nga detyra të Drejtorit të SHISH-it, Visho Ajazi pas dorëheqjes, por Presidenti Ilir Meta ende nuk e ka hedhur firmën për zëvendësuesin e tij, Helidon Bendo emri i të cilit u propozua rreth një javë më parë nga kryeministrit Edi Rama. Në një intervistë të mëparshme, Meta u shpreh se nuk ka asnjë emergjencë për ta dekretuar emrin e ri sa kohë që Bendo mban detyrën e zv.Drejtorit të SHISH.
Megjithatë, burime të rezervuara shprehen për “Mapo” se edhe Meta ka hezitimet e tij para së të hedhë firmën dhe një ndër to duket se lidhet me faktin se dikur Bendo mbante edhe një emër tjetër të deklaruar tashmë në dokumentin e dekriminalizimit.
Në këtë dokument, pyetjes nëse ka ndryshuar zyrtarisht ndonjë nga të dhënat e gjeneralitetit apo ka përdorur gjeneralitet tjetër, Bendo i është përgjigjur: “Po. Eshtë përdorur emri Johan i cili është emri i pagëzimit. E kam përdorur gjatë periudhës së qëndrimit në Greqi”. Periudha e qëndrimit në Greqi e Bendos ka qënë nga viti 91’-93’.
Ndërkohë, katër vitet e fundit karriera e Bendos ka qënë e përqëndruar nën drejtimin e degëve të marrëdhënieve me jashtë duke punuar kryesisht me amerikanët dhe partnerët e tjerë të rëndësishëm të vendeve të BE-së, që do të thotë se mbështetja nga vendet perëndimore duket se nuk do t’i mungojë.
Kjo karrierë gjithnjë në ngjitje bëri që në fillim të vitit të kaluar Helidon Bendo të propozohej nga kreu qeverisë si zëvendësdrejtor dhe më pas të merrte edhe aprovimin e ish-presidentit, Bujar Nishani.
