Partia Socialiste ka vendosur që të trajnojë deputetët e Grupit të saj Parlamentar për mënyrën se si do të sillen me mediat.
Në një takim të zhvilluar gjatë ditës së shtunë në qytetin e Pogradecit, deputetët e rinj të Partisë Socialiste kanë marrë udhëzime për mënyrën se si duhet të sillen me mediat dhe si duhet t’i shmangin kurthet e gazetarëve, shkruan “Panorama”.
Në axhendën që u është shpërndarë deputetëve të PS-së, pas seancës plenare të ditës së enjte, ishte e përcaktuar qartë mënyra se si socialistët e rinj do të trajnohen në lidhje me mediat.
Gjatë ditës së djeshme, ligjvënësit e rinj socialistë janë trajnuar lidhur me çështjet: Pse të bisedoni me mediat?; Kush janë mediat?; Si të bisedoni me ta?; Taktikat e intervistimit; Ruajtja e kontrollit; Shmangia e kurtheve; Konferenca për shtyp; Takime me improvizime; Fuqia e pasionit.
Ky trajnim i deputetëve të PS-së në lidhje me marrëdhënien që duhet të kenë me mediat vjen në një kohë kur vetë Kryeministri Rama është përplasur hapur me përfaqësuesit e medias në daljet e tij publike.
Axhenda e trajnimit të deputetëve socialistë ka pasur të parashikuar që në përfundim të trajnimit për raportin që deputetët duhet të kenë me mediat, ligjvënësit socialistë të viheshin në provë për leksionet që kishin marrë.
Kështu, tre lektorë, Zhenya Harrison, Fred Harrison e George Ajjan, kanë improvizuar intervista me deputetët e rinj socialistë për të mësuar teknika se si duhet të sillen ligjvënësit përballë gazetarëve. Deputetët janë ndarë në dy grupe dhe më pas kanë zhvilluar intervista individuale, duke inskenuar sikur janë përballë medias.
Në përfundim të këtij trajnimi, kanë qenë tre lektorët e huaj që u kanë dhënë udhëzime deputetëve për pikat, të cilat duhet të përmirësojnë. Ky trajnim i deputetëve të PS-së vjen në një kohë kur Grupi Parlamentar i socialistëve ka firmosur edhe marrëveshjen e mirëkuptimit mes Grupit të PS dhe ministrave të qeverisë.
PANORAMA
